Бошқа мамлакатга саёҳат қилмоқчи бўлган оила Тошкент аэропортида паспорт назоратидан ўтиб, самолётга ўтирган, аммо белгиланган мамлакатга етиб боргач, у ердаги паспорт назорати оила фарзандининг паспортини қонуний кучга эга эмас деб топган. Бу ҳақда Facebook’даги «Потребитель.уз» саҳифаси сайтида айтилади.
Ҳар битта паспортда чегарачилар махсус ускунада ультрабинафша нури остида кўриши мумкин бўлган алоҳида белгилар бор. Юқорида тилга олинган боланинг паспортида эса саҳифалар нумерацияси нотўғри эканлиги ва герб паспорт корешогига сурилиб кетгани аниқланган. Бу эса паспортни қонуний кучга эга бўлмаган ҳолатга келтиради.
Хўш, бу ҳолатда ким айбдор? Паспорт столими? Одамларни яроқсиз паспорт билан бошқа мамлакатга қўйиб юборган Тошкент аэропортидаги паспорт назоратими? Чипталарга 10 миллион сўм сарфланган. Вақт ва асаблар сарфланган. Режалар бузилган. Оила шунчаки самолётда у ёқдан бу ёққа бориб келган.
Facebook’даги гуруҳда шу масала муҳокама қилинаётган пайтда оналардан яна бири ўз боласининг киндер-паспортини махсус ультрабинафшали чироқда текшириб кўриб, унда ҳам саҳифалар нумерацияси мувофиқ эмаслиги, герб эса корешокка тушиб қолганини аниқлади. Маълум бўлишича, иккала паспорт серияси бир хил бўлган. Демак яроқсиз киндер-паспортлар кўплаб оилаларга берилган.
Профессионал ҳуқуқшунослар бундай вазиятда қуйидагича иш тутишни маслаҳат беради:
- Ички ишлар органларининг хорижга чиқиш-келиш ва фуқароликни расмийлаштириш (ОВИР) ҳудудий ва шаҳар бўлинмасига расмий шикоятнома (2 нусхада).
- Ички ишлар вазирлигига шикоятнома (2 нусхада).
- Жисмоний ва юридик шахслар мурожаатлари тўғрисидаги қонунга мувофиқ, 15 кун ичида жавоб берилади.
- Шикоятномаларга мавжуд ҳужжатлар нусхалари илова қилинади ва албатта контакт маълумотлари кўрсатилади.
- Жавоб олингач, натижага қараб, зарарни қоплаш ҳақидаги даъво аризаси билан фуқаролик судига мурожаат қилинг. Ушбу ҳолатда жавобгарлар учта бўлади — ИИВ (паспорт ишлаб чиқарувчи), чегара хизмати, хорижга чиқиш-келиш ва фуқароликни расмийлаштириш бўлинмаси (ОВИР)
Изоҳ (0)