Toshkent metrosidagi interval soatlari 20-yanvargacha ishlamaydi

Toshkent metropolitenidagi soat va poyezd ketgan vaqtni ko‘rsatuvchi tablolar — interval soatlari 8-yanvardan o‘chirildi. Metro bekatlari kassalarida osilgan e’lonlarga ko‘ra, ular 20-yanvarga qadar o‘chiq bo‘ladi.

Ma’lum qilishlaricha, interval soatlari “texnik sabablarga ko‘ra” o‘chirilgan. Boshqa tafsilotlar ma’lum qilinmagan. “Daryo” mobil muxbirlarining ma’lum qilishicha, tablolar 8-yanvar kuni tushdan so‘ng o‘chirilgan.

“Bu — sir”

Ulardan biri shunday yozadi: “Bekatdagi nazoratchi ayollardan biridan buning sababini so‘rasam, texnik sabablarga ko‘ra, deb aytdi. ‘Aynan qanaqa texnik sabablar, ular qachon bartaraf etiladi?’, deya yana savol bersam: ‘Siz metroda ishlaysizmi?’, deb menga savol berib qoldi. Metroda ishlamasligimni aytganimdan so‘ng, ‘Metroda ishlamasangiz, unda bu — sir!’, dedi. Vaqtni ko‘rsatadigan tabloning ishlamasligi sababi qanday qilib sir bo‘lishi mumkinligiga aqlim yetmadi”.

Boshqa bir mobil muxbirga esa metro bekati mas’ullaridan biri tablolar “elektr energiyasini tejash maqsadida o‘chirib qo‘yilgani”ni aytgan. “Menimcha, bekatdagi mas’ul men bilan hazillashdi — har bekatda atigi ikki dona bo‘lgan vaqt tablolarini o‘chirish bilan qancha ham elektr tokini tejab qolish mumkin axir?!”, — deydi mobil muxbir.

Metro bekatlaridagi interval soatlarining o‘chirilishi “Toshkent jamoat transporti” forumida ham muhokama qilingan. Unda foydalanuvchilar poyezdlarning ketish vaqtini ko‘rsatuvchi tizim almashtirilayotgan bo‘lishi mumkinligini taxmin qilgan.

Toshkent metropoliteni bekatlarida ishlamayotgan vaqt tablolarini suratga olish imkoni bo‘lmadi — metro bekatlarida noma’lum sabablarga ko‘ra foto va videoga olish taqiqlangan. Vaholanki, internetda barcha bekatlarning fotosuratlari va videolarini istalgancha topish mumkin.

Ma’lumot uchun, Toshkent metropoliteni 29 bekatdan iborat bo‘lib, ba’zi ma’lumotlarga ko‘ra undan kuniga 160—180 ming, boshqa ma’lumotlarga ko‘ra 200 ming yo‘lovchi foydalanadi.