Тошкент метрополитенидаги соат ва поезд кетган вақтни кўрсатувчи таблолар — интервал соатлари 8 январдан ўчирилди. Метро бекатлари кассаларида осилган эълонларга кўра, улар 20 январга қадар ўчиқ бўлади.
Маълум қилишларича, интервал соатлари «техник сабабларга кўра» ўчирилган. Бошқа тафсилотлар маълум қилинмаган. «Дарё» мобил мухбирларининг маълум қилишича, таблолар 8 январь куни тушдан сўнг ўчирилган.
«Бу — сир»
Метрополитенда ойлик йўл чиптаси ёки бошқа имтиёзли чипта, гувоҳномалар билан, шунингдек, бир муддат аввал кўпроқ жетон олиб, яқин вақт ичида кассага яқинлашмаган йўловчилар интервал соатлари ўчирилиши ҳақидаги эълонлардан бехабар қолган. Улар орасида «Дарё» муштарийлари ҳам бор.Улардан бири шундай ёзади: «Бекатдаги назоратчи аёллардан биридан бунинг сабабини сўрасам, техник сабабларга кўра, деб айтди. ‘Айнан қанақа техник сабаблар, улар қачон бартараф этилади?’, дея яна савол берсам: ‘Сиз метрода ишлайсизми?’, деб менга савол бериб қолди. Метрода ишламаслигимни айтганимдан сўнг, ‘Метрода ишламасангиз, унда бу — сир!’, деди. Вақтни кўрсатадиган таблонинг ишламаслиги сабаби қандай қилиб сир бўлиши мумкинлигига ақлим етмади».
Бошқа бир мобил мухбирга эса метро бекати масъулларидан бири таблолар «электр энергиясини тежаш мақсадида ўчириб қўйилгани»ни айтган. «Менимча, бекатдаги масъул мен билан ҳазиллашди — ҳар бекатда атиги икки дона бўлган вақт таблоларини ўчириш билан қанча ҳам электр токини тежаб қолиш мумкин ахир?!», — дейди мобил мухбир.
Метро бекатларидаги интервал соатларининг ўчирилиши «Тошкент жамоат транспорти» форумида ҳам муҳокама қилинган. Унда фойдаланувчилар поездларнинг кетиш вақтини кўрсатувчи тизим алмаштирилаётган бўлиши мумкинлигини тахмин қилган.
Тошкент метрополитени бекатларида ишламаётган вақт таблоларини суратга олиш имкони бўлмади — метро бекатларида номаълум сабабларга кўра фото ва видеога олиш тақиқланган. Ваҳоланки, интернетда барча бекатларнинг фотосуратлари ва видеоларини исталганча топиш мумкин.
Маълумот учун, Тошкент метрополитени 29 бекатдан иборат бўлиб, баъзи маълумотларга кўра ундан кунига 160—180 минг, бошқа маълумотларга кўра 200 минг йўловчи фойдаланади.
Изоҳ (0)