Hozirda tergov qilinayotgan Qozog‘istonning sobiq iqtisodiyot vaziri Quvondiq Bishimbayev sudda prezident Nursulton Nazarboyevdan kechirim so‘radi. Bunga qaramay u o‘z aybini tan olmadi, deb xabar beradi “RBK”.
Davlat mablag‘ini qonunga xilof tarzda sarflash va poraxo‘rlikda ayblanayotgan Bishimbayev omma oldida prezidentga pand berganini tan oldi.
“Men prezident oldida aybdor ekanligimni bilaman. Jaksibayev, Jakupov kabi men bilgan va men ishga taklif qilgan insonlar menga pand berdi. Men bunga javobgarlikni prezident oldida o‘z zimmamga olaman. Vaziyat shunday tus olganidan uyalaman va prezident ishonchini oqlamaganimdan og‘rinaman. Men kadrlar tanlashda adashdim. Atrofimga ishonchimni suiiste’mol qilgan insonlarni to‘pladim. Men davlat rahbari va xalqimdan buning uchun kechirim so‘rayman”, — deydi Bishimbayev.
Shuningdek, sobiq vazir o‘z faoliyatidagi muvaffaqiyatlariga aynan prezident sabab erishganini ham ta‘kidlab o‘tdi.
Bishimbayev 2017-yilning yanvar oyida hibsga olingan edi. U 2016-yilning 6-mayidan 28-dekabriga qadar Qozog‘iston iqtisodiyot vaziri lavozimida ishlagan.
Izoh (0)