Gollandiyalik himoyachi Virjil van Deyk faoliyatini “Liverpul” futbol klubida davom ettiradi. Bu haqdagi xabar “Sautgempton” klubi matbuot xizmati tomonidan e’lon qilindi.
Kelib chiqishi surinamlik bo‘lgan van Deyk 1991-yil Gollandiyaning Breda shahrida tug‘ilgan. “Sautgempton” mazkur futbolchini 2015-yil Shotlandiyaning “Seltik” klubidan 12 million yevro evaziga sotib olgandi. Oradan ko‘p o‘tmay, himoyachi “Liverpul”ga rekord summa evaziga pullandi. Norasmiy manbalar ma’lumotiga ko‘ra, “mersisayd” klubi Virjil uchun 85 million yevro to‘lab bergan.
“Sautgempton” saytidagi xabarda ham Virjil van Deykning dunyo futboli tarixida eng qimmat himoyachiga aylangani ko‘rsatib o‘tilgan, biroq uning aniq narxi aytilmagan. Bungacha “Manchester Siti” Kayl Uolker hamda Benjamin Mendi uchun mos ravishda “Tottenhem” hamda “Monako” futbol klublariga 60 million yevrodan to‘lab bergan hamda himoyachilarni sotib olish narxi bo‘yicha rekord qo‘ygandi.“Siti”dan yana bir ulkan xarid. Klub “Monako” futbolchisini eng qimmat himoyachiga aylantirdi
Gollandiya milliy termasi safida 12 ta uchrashuv o‘tkazib ulgurgan van Deyk “Liverpul” himoya chizig‘ini kuchaytirish uchun kerak bo‘ladi. U yangi klubi safida 4-raqam ostida harakat qiladi. “Liverpul” a’zosi sifatida rasman 1-yanvar kuni tanishtirilishi kutilmoqda.
Bungacha Yurgen Klopp boshqaruvidagi “Liverpul”ning oldinga chizig‘i borasida bir qator iliq fikrlar bildirib kelindi. Muhammad Saloh, Sadio Mane, Filippe Koutinyo, Roberto Firmino, Daniel Starrij kabi hujumchilari bor jamoaning himoyasi esa har safar tanqid ostida qoldi. Shundan kelib chiqib, “Liverpul” himoyani tartibga solish uchun o‘z tarixidagi eng qimmat transferga qo‘l urishga qaror qildi.
Izoh (0)