O‘zbekiston Respublikasi Bosh vazirining o‘rinbosari – moliya vaziri Jamshid Qo‘chqorov O‘zbekiston Respublikasi Oliy Majlisi Senatining o‘n uchinchi yalpi majlisidagi ma’ruzasida qayd etishicha, 2018-yilda sog‘liqni saqlash muassasalariga qariyb bir trillion so‘mlik dori-darmon vositalari va tibbiyot buyumlari xarid qilinadi. Bu joriy yilda mazkur yo‘nalishga sarflangan xarajatdan 2,5 barobar ko‘pdir. Bu haqda O‘zA xabar bermoqda.
Onkologiya shifoxonasida davolanayotgan bemorning dori-darmonlari uchun hozirgi paytda bir kunda 10 700 so‘m ko‘zda tutilgan bo‘lsa, kelgusi yilda mazkur miqdor 25 700 so‘mni tashkil etadi.
Skrining markazlarini jihozlash, dori-darmon va tibbiyot uchun zarur bo‘lgan vositalar bilan ta’minlashga 86 milliard so‘m mablag‘ yo‘naltiriladi. Jumladan, barcha tuman va shahar tibbiyot birlashmalarining perenatal diagnostika kabinetlarini yuqori texnologiyali UZD-skanerlari bilan jihozlanadi. Buning uchun 200 dona UZD-skaneri xarid qilinadi.
Vazirning ta’kidlashicha, 2018-yil davlat budjeti parametrlarida sog‘liqni saqlash sohasiga xarajatlar joriy yildagiga nisbatan 1,3 baravar ortib, 9,6 trillion so‘mni tashkil etadi.
Izoh (0)