Sirdaryoda jinoyatlar soni o‘tgan yilga nisbatan salkam 22 foizga kamaydi

Sirdaryo viloyati hududida 2017-yilning 11 oyi davomida jami 2394 ta jinoyatlar sodir etilgan, deb xabar beradi viloyat IIB matbuot xizmati.

2016-yilning 11 oyi davomida esa 3046 ta jinoyat sodir etilganini inobatga olgan holda, bu ko‘rsatkich viloyatda jinoyatlar soni kamayganidan dalolat beradi. Viloyatda joriy yilning 11 oyi davomida o‘tgan yilgi 11 oyga nisbatan jami 652 ta ya’ni 21,4 foizga kamroq jinoyat sodir etilgan.

Viloyat miqyosida joriy yilning 11 oy davomida jami 504 marta sodir etilgan jinoyatlarni fosh etish maqsadida tezkor qidiruv tadbirlari o‘tkazildi.

Ulardan 20 ta qasddan badanga o‘rtacha og‘ir shikast yetkazish, 17 ta odam savdosi, 5 ta bosqinchilik, 6 ta tovlamachilik, 378 ta o‘g‘irlik, 85 ta noqonuniy qurol saqlash, 106 ta giyohvandlik moddasini saqlash, 39 ta bezorilik va 65 ta boshqa turdagi jinoyatlar fosh qilindi.

Tezkor qidiruv tadbirlari davomida 2017-yil boshidan buyon 156 nafar jinoyat sodir etib, qidiruvda bo‘lgan shaxslar qo‘lga olindi.