2018-yil 1-yanvar kuni O‘zbekiston Prezidenti Shavkat Mirziyoyevning Xitoyga davlat tashrifi doirasida 2017-yil 12-mayda imzolangan O‘zbekiston va Xitoy Hukumati o‘rtasida xalqaro avtomobil transporti to‘g‘risidagi bitim kuchga kiradi. Bu haqda TIV matbuot xizmati xabar bermoqda.
Bitimning 21-moddasi shartlariga muvofiq hujjat tomonlarning diplomatik kanallar orqali davlat ichkarisidagi zaruriy amallar bajarilganligi to‘g‘risida so‘nggi yozma xabari qabul qilgan vaqtdan boshlab 30 kun o‘tgach kuchga kiradi. Xitoy tomonining tegishli xabari 2017-yilning 2-dekabrida qabul qilindi.
Bitimning asosiy maqsadi ikki davlat o‘rtasida xalqaro avtomobil tashuvlarini va ularning hududlari orqali tranzit o‘tishlarni amalga oshirish uchun o‘zaro maqbul huquqiy sharoitlarni yaratish hisoblanadi.
Bitimga muvofiq, tomonlar ikki davlatdan birida ro‘yxatdan o‘tgan transport vositalari orqali vakolatli davlat organlarining o‘zaro kelishuvi asosida belgilangan yo‘nalishda xalqaro avtomobil tashuvlarini o‘z davlatlari hududida amalga oshirish huquqini beradi.
Hujjatning shartlariga muvofiq, ikki tomonlama va tranzit tashuvlar ikki mamlakatning vakolatli organlari, xususan, O‘zbekiston avtomobil va daryo transporti agentligi va XXR transport vazirligi tomonidan berilgan ruxsatnomalar asosida amalga oshiriladi. Shu maqsadda vakolatli organlar har yili bir-biriga yuklar olib o‘tish uchun ruxsatnoma blankalarining o‘zaro kelishilgan miqdorini taqdim qiladi.
Izoh (0)