Криптовалютага инвестиция киритиб, бойиб кетган дунёдаги илк миллиардерлар эгизак ака-укалар Кэмерон ва Тейлор Уинклвосслар бўлди. «ТАСС» ака-уканинг қандай қилиб бу даражага эришгани ва уларнинг Facebook ижтимоий тармоғи билан алоқаси ҳақида ҳикоя қилди.
Дунё матбуоти ака-ука Уинклвосслар ҳақида анчадан буён ёзмай қўйган эди. Бироқ The SundayTelegraph уларнинг 2013 йилда биткоинга 11 миллион доллар инвестиция қилиб, 2017 йилда миллиардерга айлангани ҳақида мақола эълон қилганидан сўнг уларнинг фамилияси оғизга тушди.
2004 йилда улар Facebook асосчиси Марк Цукербергни судга берган. Уинклвоссларнинг фикрича, Facebook тармоғи уларга тегишли ConnectU сайти ғоясининг ўғирланиши натижасида яратилган. Бу сайт Гарвард ва АҚШнинг бошқа университетлари талабалари учун ёпиқ ижтимоий тармоқ сифатида тақдим этилган. Ака-ука сайт устидаги ишни 2002 йилда курсдоши Дива Нарендра билан бошлаган.
2003 йилда ака-ука Цукербергни ишга ёллаган ва унга HarvardConnection’нинг (ConnectU’нинг биринчи номи) дастур кодини берган. Шундан сўнг Цукерберг Уинклвосслар ва Нарендра билан алоқага чиқмай қўйган ва Facebook’ни яратиш устида ишлай бошлаган.
Цукерберг билан суд иши бошланганидан тўрт йил ўтгач, тинчлик келишуви доирасида ака-ука 65 миллион доллар олган. Бу пулларнинг бир қисмини улар биткоинлар сотиб олишга сарфлаган ва 2017 йилда миллиардерга айланди.
Биткоин қандай қилиб бу даражага келди?
Дунёдаги биринчи биткоин ўтказмаси 2009 йилнинг январь ойида амалга оширилган. Шу вақтда 50 та криптовалюта муомалага чиқарилган. Бир йилдан сўнг америкалик Ласло Ханеч уйига пицца буюртирган ва унинг учун 10 минг биткоин тўлаган. Бу Сатоши Накамотонинг криптовалютасидаги биринчи харид бўлган. Ўшанда битта криптовалютани бир центдан арзонроққа сотиб олиш мумкин эди.
2013 йилда Уинклвосслар биткоин сотиб олган вақтда битта валютанинг курси 100 доллардан ортиқ эди. Улар 100 мингта биткоин сотиб олган. Ўша вақтда ака-ука дунёдаги ҳар юзта биткоиннинг биттасига эгалик қилган.
Тўрт йил ичида криптовалютанинг курси 100 баравар ошди. 2017 йилнинг 4 декабрь ҳолатига биткоин курси 11 минг доллардан ортиқни ташкил қилди.
Олимпиада ва кинематограф
Мактабда ўқиш вақтида, кейинчалик университетда ака-ука Уинклвосслар фаол равишда академик эшкак эшиш билан шуғулланган. 2008 йилда улар Пекинда бўлиб ўтган Олимпиада ўйинларида иштирок этган ва ҳатто финалга чиққан, бироқ унда охирги ўринни эгаллаган.
2010 йилда эса режиссёр Дэвид Финчернинг «Ижтимоий тармоқ» фильми тақдим этилган. Фильм Facebook’нинг яратилиши ҳақида ҳикоя қилган. Иккала ака-ука — Тейлор ва Кэмероннинг образини актёр Арми Хаммер яратган. Фильм ижодкорларининг айтишича, улар Уинклвосслар ролига мос келувчи эгизак актёрларни топа олмаган.
Уинклвосслар биринчи бўлмаслиги мумкин
Уинклвосслар 2013 йилда 100 мингта биткоин сотиб олганини яширмаган. Аксинча, улар бу билан фахрланган. Ака-уканинг миллиардер бўлганини тушуниш учун уларга тегишли биткоиннинг АҚШ долларидаги қийматини ҳисоблаш етарли. Бунда айнан Уинклвосслар дунёдаги биринчи биткоин миллиардерлар дейиш мумкин эмас. Чунки ким қанча криптовалютага эгалик қилиши ҳақида аниқ маълумотлар йўқ.
Энг кўп биткоинга эгалик қилувчи киши унинг яратувчиси Сатоши Накамото, деб ҳисобланади. Тахминларга кўра, унда бир миллионта биткоин бор. Бироқ бу маълумот, шунингдек, Сатоши Накамотонинг аслида ким эканлиги ҳақидаги маълумот ҳеч қачон тасдиқланмаган.
Изоҳ (0)