Misrda masjiddagi terakt qurbonlari xotirasi uchun yodgorlik o‘rnatiladi

Misrda Sinay yarimorolidagi masjidda yuz bergan terakt qurbonlari xotirasi uchun yodgorlik quriladi. Bu haqda, Misr prezidenti Abdulfattoh as-Sisiyning tegishli farmoyishiga asoslanib, “RIA Novosti” xabar bermoqda.

Yodgorlik qachon va qayerga o‘rnatilishi haqida keyinroq batafsil axborot berilishi aytilmoqda.

Shuningdek, Misr prezidenti portlash oqibatida halok bo‘lganlarning oilalari uchun 11 ming dollardan kompensatsiya puli ajratish haqida ko‘rsatma bergan.

So‘nggi ma’lumotlarga ko‘ra, Sinay shimolidagi Bir al-Obid shahridagi masjidga terrorchilar tomonidan amalga oshirilgan hujum oqibatida 305 kishi halok bo‘lgan. Misr rasmiylariga ko‘ra, hujumga aloqador barcha jangarilar yo‘q qilingan.

Avvalroq, mazkur terakt oqibatida ko‘plab odamlar halok bo‘lgani munosabati bilan O‘zbekiston Prezidenti Shavkat Mirziyoyev misrlik hamkasbiga hamdardlik bildirgani haqida xabar berilgan edi.