Hamid Karzay: AQSh Afg‘onistonda tinchlik o‘rnatilishiga xalal bermoqda

Afg‘onistonning sobiq prezidenti Hamid Karzay IShID terrorchilik tashkilotining mintaqadagi mavqei kuchayib borayotgani uchun javobgarlikni AQSh zimmasiga yukladi. Karzay bu haqda Berliner Zeitung gazetasiga bergan intervyusida to‘xtalib o‘tgan, deya xabar bermoqda “TASS”.

Karzayning fikricha, Afg‘oniston “xorijiy qudratli davlatlar uchun nizolashish maydoniga aylanib qolgan”. “Afg‘oniston ichkarisidagi milliy yarashuv yo‘lidagi eng asosiy to‘siq — bu AQSh va Pokiston”, — dedi Karzay.

Sobiq prezidentning fikricha, “ayni vaqtda Afg‘onistonda ham faollashib qolgan IShID terrorchilik tashkiloti bevosita AQSh siyosatining hamda ushbu mamlakatning Afg‘onistondan chiqib ketmayotgani hosilasidir”.

“AQShning Afg‘onistondagi asosiy manfaati — mintaqada ustunlik qilish bo‘yicha global raqobatda yutish istagidir”, — deydi Karzay. Uning so‘zlariga ko‘ra, Afg‘onistondagi amerikalik harbiy sonini oshirish borasida qadamlar xavfsizlik bilan bog‘liq muammoni hal qila olmaydi.

Karzayning fikricha, terrorchilarga qarshi kurashda muvaffaqiyatga erishish uchun AQSh “Rossiya, Xitoy va Eron kabi qudratli davlatlar bilan hamkorlik qilish yo‘llarini izlashi zarur”.