Афғонистоннинг собиқ президенти Ҳамид Карзай ИШИД террорчилик ташкилотининг минтақадаги мавқеи кучайиб бораётгани учун жавобгарликни АҚШ зиммасига юклади. Карзай бу ҳақда Berliner Zeitung газетасига берган интервьюсида тўхталиб ўтган, дея хабар бермоқда «ТАСС».
Карзайнинг фикрича, Афғонистон «хорижий қудратли давлатлар учун низолашиш майдонига айланиб қолган». «Афғонистон ичкарисидаги миллий ярашув йўлидаги энг асосий тўсиқ — бу АҚШ ва Покистон», — деди Карзай.
Собиқ президентнинг фикрича, «айни вақтда Афғонистонда ҳам фаоллашиб қолган ИШИД террорчилик ташкилоти бевосита АҚШ сиёсатининг ҳамда ушбу мамлакатнинг Афғонистондан чиқиб кетмаётгани ҳосиласидир».
«АҚШнинг Афғонистондаги асосий манфаати — минтақада устунлик қилиш бўйича глобал рақобатда ютиш истагидир», — дейди Карзай. Унинг сўзларига кўра, Афғонистондаги америкалик ҳарбий сонини ошириш борасида қадамлар хавфсизлик билан боғлиқ муаммони ҳал қила олмайди.
Карзайнинг фикрича, террорчиларга қарши курашда муваффақиятга эришиш учун АҚШ «Россия, Хитой ва Эрон каби қудратли давлатлар билан ҳамкорлик қилиш йўлларини излаши зарур».
Изоҳ (0)