Bitkoin kursi 20-noyabr, dushanba kuni yana 2,8 foizga o‘sib, 8255,2 dollarni tashkil etdi. Bu haqda CoinDesk.com ma’lumotlariga tayanib, “Interfaks” xabar berdi.
Bitkoin o‘tgan yilning oxiridan buyon 700 foizga qimmatlashdi. O‘tgan hafta davomida kriptovalyuta 17 foizga sakrab ketdi, bunga bitkoinning ikkita zanjirga ajralishi sodir bo‘lmagani sabab bo‘lgan.
Tahlilchilar bitkoin kursining o‘sishini SME birja operatorlari tomonidan dekabr oyida bitkoin uchun fyucherslarning ishga tushirilishi borasidagi rejasini ma’lum qilganidan so‘ng, institutsional investorlarning qiziqishi ortganiga bog‘lamoqda.
Bundan tashqari Square Cash to‘lov tizimi o‘tgan hafta o‘z foydalanuvchilarining “kichik qismi” smartfon dasturi orqali to‘g‘ridan to‘g‘ri bitkoin sotib olishi mumkinligini ma’lum qilgandi. “Kriptovalyuta jismoniy shaxslarning global moliyaviy tizimda ishtirok etish qobiliyatiga jiddiy ta’sir ko‘rsatishi mumkinligiga ishonamiz va biz bu haqda ko‘proq xabardor ekanligimizdan mamnunmiz”, — deyiladi Square’ning bayonotida.
Shuningdek, Square direktorlar kengashi raisi hamda Twitter’ning bosh ijrochi direktori bo‘lgan Jek Dorsi “nafaqat Square, balki Twitter ham blokcheyn va kriptovalyuta kabi texnologiyalarga e’tibor qaratishini” istashini ma’lum qildi.
Izoh (0)