Биткоин курси 20 ноябрь, душанба куни яна 2,8 фоизга ўсиб, 8255,2 долларни ташкил этди. Бу ҳақда CoinDesk.com маълумотларига таяниб, «Интерфакс» хабар берди.
Биткоин ўтган йилнинг охиридан буён 700 фоизга қимматлашди. Ўтган ҳафта давомида криптовалюта 17 фоизга сакраб кетди, бунга биткоиннинг иккита занжирга ажралиши содир бўлмагани сабаб бўлган.
Таҳлилчилар биткоин курсининг ўсишини СМЕ биржа операторлари томонидан декабрь ойида биткоин учун фьючерсларнинг ишга туширилиши борасидаги режасини маълум қилганидан сўнг, институциональ инвесторларнинг қизиқиши ортганига боғламоқда.
Бундан ташқари Square Cash тўлов тизими ўтган ҳафта ўз фойдаланувчиларининг «кичик қисми» смартфон дастури орқали тўғридан-тўғри биткоин сотиб олиши мумкинлигини маълум қилганди. «Криптовалюта жисмоний шахсларнинг глобал молиявий тизимда иштирок этиш қобилиятига жиддий таъсир кўрсатиши мумкинлигига ишонамиз ва биз бу ҳақда кўпроқ хабардор эканлигимиздан мамнунмиз», — дейилади Square’нинг баёнотида.
Шунингдек, Square директорлар кенгаши раиси ҳамда Twitter’нинг бош ижрочи директори бўлган Жек Дорси «нафақат Square, балки Twitter ҳам блокчейн ва криптовалюта каби технологияларга эътибор қаратишини» исташини маълум қилди.
Изоҳ (0)