Isroil prezidenti Reuven Rivlin falastinlik jangarini qasddan bo‘lmagan holatda o‘ldirishda ayblangan askar Elor Azariyani afv etish haqidagi so‘rovni rad etdi. Bu haqda Forum Daily xabar bermoqda.
Hozirda 18 oylik qamoq jazosiga hukm qilingan (keyinchalik bu muddat 14 oygacha qisqartirildi) Azariya harbiylar uchun qamoqxonada jazosini o‘tamoqda.
Prezident so‘zlariga ko‘ra, “yanada ko‘proq afv etish armiya va davlat nufuziga salbiy ta’sir ko‘rsatadi”.
2016-yil martda Tel-Rumeyda tumanidagi Jilber chorrahasida pichoqlar bilan qurollangan ikki arab jangarisi harbiy xizmatchilarga tashlangan va ulardan birini jarohatlagandi. Ularga qarata o‘t ochilgach biri o‘ldirilgan, ikkinchisi esa yaralangandi.
Hodisa joyiga tez yordam brigadasi yetib keldi. Shundan so‘ng sud muhokamasiga sabab bo‘lgan voqea yuz berdi: Azariya yarador Abdulfattoh ash-Sharifning boshiga qarata o‘q uzadi va uni o‘ldiradi.
“Betselem” huquq himoyachilari tashkiloti mazkur holat aks etgan videoyozuvni e’lon qildi. Shundan so‘ng ko‘p o‘tmay harbiy xizmatchi qo‘lga olindi.
Izoh (0)