2016-yil avgustida Livandagi festivalda misrlik mashhur xonanda Shirin Abdulvahobdan bir muxlis “Sen Nil suvini ichganmisan?” nomli qo‘shig‘ini ijro etishni iltimos qilgan. Bu haqda Meduza hikoya qiladi.
Xonanda muxlisiga aslida Nil suvini ichmaslik kerakligi, bu shistosomozga (parazitar tropik kasallik) sabab bo‘lishi mumkinligini bildirgan.
“Yaxshisi, Evian suvini iching”, — maslahat bergan Shirin.
Bu izoh aks etgan video bir yildan ko‘proq vaqt o‘tib, 14-noyabrda internetda paydo bo‘lgach, misrliklar xonandadan Nil suvining sifati haqidagi salbiy fikrlari uchun ranjidi.
Twitter’da #IWillDrinkFromtheNileandWonʼtListentoSherine (#MenNildanSuvIchamanShirinniTinglamayman) fleshmobi boshlandi. Misr Teleradio ittifoqi Abdulvahobning qo‘shiqlari va kliplarini man etdi, xonandalar uyushmasi esa jonli chiqishlarga berilgan ruxsatni qaytarib oldi.
Yuristlar Xani Ged va Samir Sabri Shirinni Misr davlatini haqorat qilish va sayyohlarni cho‘chitish, turizm industriyasiga zarar yetkazishda ayblab sudga berdi. Al-Ahram nashri xonanda 23-dekabrda Qohira sudi oldida javob berishini bildirdi.
Uni hamyurtlaridan kechirim so‘rashi ham qutqarmadi. Shirin o‘tgan yili aytgan so‘zlarini “ahmoqona hazil” deb atadi.
Izoh (0)