2016 йил августида Ливандаги фестивалда мисрлик машҳур хонанда Ширин Абдулваҳобдан бир мухлис «Сен Нил сувини ичганмисан?» номли қўшиғини ижро этишни илтимос қилган. Бу ҳақда Meduza ҳикоя қилади.
Хонанда мухлисига аслида Нил сувини ичмаслик кераклиги, бу шистосомозга (паразитар тропик касаллик) сабаб бўлиши мумкинлигини билдирган.
«Яхшиси, Эвиан сувини ичинг», — маслаҳат берган Ширин.
Бу изоҳ акс этган видео бир йилдан кўпроқ вақт ўтиб, 14 ноябрда интернетда пайдо бўлгач, мисрликлар хонандадан Нил сувининг сифати ҳақидаги салбий фикрлари учун ранжиди.
Twitter’да #IWillDrinkFromtheNileandWonʼtListentoSherine (#МенНилданСувИчаманШиринниТингламайман) флешмоби бошланди. Миср Телерадио иттифоқи Абдулваҳобнинг қўшиқлари ва клипларини ман этди, хонандалар уюшмаси эса жонли чиқишларга берилган рухсатни қайтариб олди.
Юристлар Хани Гед ва Самир Сабри Ширинни Миср давлатини ҳақорат қилиш ва сайёҳларни чўчитиш, туризм индустриясига зарар етказишда айблаб судга берди. Al-Ahram нашри хонанда 23 декабрда Қоҳира суди олдида жавоб беришини билдирди.
Уни ҳамюртларидан кечирим сўраши ҳам қутқармади. Ширин ўтган йили айтган сўзларини «аҳмоқона ҳазил» деб атади.
Изоҳ (0)