Toshkentda 8-noyabr kuni “Yil imomi” ko‘rik-tanlovining respublika bosqichi bo‘lib o‘tdi, deya xabar bermoqda O‘zbekiston musulmonlari idorasi Toshkent shahar vakilligi matbuot xizmati.
Respublika bosqichiga yetib kelgan 14 nafar imom-xatib maxsus nizom asosida — diniy va dunyoviy bilimlari saviyasi, tashabbuskorligi, ma’naviy-ma’rifiy targ‘ibot tadbirlari, ommaviy axborot vositalaridagi faolliklari bo‘yicha baholangan.
Tanlov yakunlariga ko‘ra, Toshkent shahar Shayxontohur tumani “Oqilon” jome’ masjidi imom-xatibi Isomiddin Ahrorov g‘olib deb topilgan.
Ikkinchi o‘rin Toshkent viloyati Qibray tumani “Sa’dulla ota” jome’ masjidi imom-xatibi Obidjon Mirhamidovga, uchinchi o‘rin esa Navoiy viloyati Nurota tumani “Chil Ustun” jome’ masjidi imom-xatibi Jamoliddin Mubinovga nasib etdi.
Toshkent shahar vakilligining qayd etishicha, 2014-yilgi “Yil imomi” tanlovida poytaxtdagi “Hazrati Ali” jome’ masjidi imom-xatibi Salohiddin Sharifov, 2015-yilgi tanlovda Toshkentdagi “To‘xtaboy” jome’ masjidi imom-xatibi Ishoqjon Begmatov, 2016-yilgi ko‘rikda esa Toshkentning “Bo‘rijar” jome’ masjidi imom-xatibi Husniddin Abdukarimov g‘olib chiqqan edi.
Mavzuga doir: “Islom ota” Toshkentdagi eng namunali masjid deb topildi
Izoh (0)