Rossiya prezidentligiga nomzodini qo‘yish istagini bildirgan teleboshlovchi Kseniya Sobchakning saylovoldi shtabini Aleksey Sitnikov boshchiligidagi siyosiy texnologlar guruhi to‘liq tarkibda tark etdi. Bu haqda shtab xodimlaridan biri ma’lum qildi, deya xabar beradi “Kommersant”.
“Shtab bo‘m-bo‘sh. Sitnikov o‘zi bilan shtab xodimlarining deyarli uchdan ikki qismini olib ketdi”, — dedi nashr manbasi.
Aleksey Sitnikov o‘z guruhining ketishiga “odatiy jarayon” deb izoh berdi.
“Hech qanday mojaro yo‘q. Shtabda to‘planganlarning barchasi menga ma’qul. Ketishim esa jarayonni tashkil etish va faoliyat maqsadlariga turlicha yondashuv bilan bog‘liq”, — dedi Sitnikov.
Psixologiya va iqtisod fanlari doktori, 1996-yilda Boris Yelsinning shtabida ishlagan Aleksey Sitnikov 25-oktabrda Kseniya Sobchak tomonidan “offlayn-yo‘nalish” rahbari sifatida tanishtirilgandi. Uning vazifalari sirasiga joylardagi shtablar faoliyatini uyushtirish, volontyorlar bilan aloqalar, imzo yig‘ishni tashkillash kirgan.
Izoh (0)