Россия президентлигига номзодини қўйиш истагини билдирган телебошловчи Ксения Собчакнинг сайловолди штабини Алексей Ситников бошчилигидаги сиёсий технологлар гуруҳи тўлиқ таркибда тарк этди. Бу ҳақда штаб ходимларидан бири маълум қилди, дея хабар беради «Коммерсантъ».
«Штаб бўм-бўш. Ситников ўзи билан штаб ходимларининг деярли учдан икки қисмини олиб кетди», — деди нашр манбаси.
Алексей Ситников ўз гуруҳининг кетишига «одатий жараён» деб изоҳ берди.
«Ҳеч қандай можаро йўқ. Штабда тўпланганларнинг барчаси менга маъқул. Кетишим эса жараённи ташкил этиш ва фаолият мақсадларига турлича ёндашув билан боғлиқ», — деди Ситников.
Психология ва иқтисод фанлари доктори, 1996 йилда Борис Ельциннинг штабида ишлаган Алексей Ситников 25 октябрда Ксения Собчак томонидан «оффлайн-йўналиш» раҳбари сифатида таништирилганди. Унинг вазифалари сирасига жойлардаги штаблар фаолиятини уюштириш, волонтёрлар билан алоқалар, имзо йиғишни ташкиллаш кирган.
Изоҳ (0)