“Esenbo‘g‘a” aeroportida O‘zbekiston davlat rahbarini Turkiya bosh vaziri o‘rinbosari Bekir Bo‘zdag va boshqa rasmiy shaxslar kutib olgan.
Xabar berishlaricha, tashrif doirasida Shavkat Mirziyoyev Anqaradagi Prezident saroyida Rajab Toyyib Erdo‘g‘on bilan muzokaralar o‘tkazadi.
O‘zAning qo‘shimcha qilishicha, oliy darajadagi muzokaralar chog‘ida O‘zbekiston va Turkiya o‘rtasida siyosiy, savdo-iqtisodiy, investitsiyaviy, transport-kommunikatsiya va boshqa sohalardagi hamkorlikni rivojlantirish masalalari muhokama qilinadi, mintaqaviy va xalqaro muammolar yuzasidan fikr almashiladi.
Muzokaralar yakunlari bo‘yicha davlat rahbarlarining Qo‘shma bayonoti qabul qilinishi, O‘zbekiston bilan Turkiya o‘rtasidagi hamkorlikni yanada rivojlantirish, ishbilarmon doiralar o‘rtasida o‘zaro manfaatli aloqalar uchun qulay sharoitlar yaratish, sayyohlar almashinuvi va madaniy-gumanitar aloqalarni faollashtirishga qaratilgan ko‘plab hujjatlar imzolanishi rejalashtirilgan.
Xabar berishlaricha, O‘zbekiston delegatsiyasining Istanbul shahriga tashrif buyurishi ham mo‘ljallangan.
Ma’lumot uchun, Prezident Shavkat Mirziyoyev Turkiyaga rossiyalik milliarder Alisher Usmonovdan ijaraga olingan “Burhon” samolyotida parvoz qildi. “O‘zbekiston havo yo‘llari” milliy aviakompaniyasi milliarderning samolyoti O‘zbekiston Prezidentining uzoq masofalarga mo‘ljallangan parvozlari uchun “amaldagi bozor narxlari bo‘yicha tijorat shartlari asosida” ijaraga olinganini ma’lum qilgan edi.
Izoh (0)