Давоми: Видео: Шавкат Мирзиёев Анқарада
«Эсенбўға» аэропортида Ўзбекистон давлат раҳбарини Туркия бош вазири ўринбосари Бекир Бўздаг ва бошқа расмий шахслар кутиб олган.
Хабар беришларича, ташриф доирасида Шавкат Мирзиёев Анқарадаги Президент саройида Ражаб Тоййиб Эрдўғон билан музокаралар ўтказади.
ЎзАнинг қўшимча қилишича, олий даражадаги музокаралар чоғида Ўзбекистон ва Туркия ўртасида сиёсий, савдо-иқтисодий, инвестициявий, транспорт-коммуникация ва бошқа соҳалардаги ҳамкорликни ривожлантириш масалалари муҳокама қилинади, минтақавий ва халқаро муаммолар юзасидан фикр алмашилади.
Музокаралар якунлари бўйича давлат раҳбарларининг Қўшма баёноти қабул қилиниши, Ўзбекистон билан Туркия ўртасидаги ҳамкорликни янада ривожлантириш, ишбилармон доиралар ўртасида ўзаро манфаатли алоқалар учун қулай шароитлар яратиш, сайёҳлар алмашинуви ва маданий-гуманитар алоқаларни фаоллаштиришга қаратилган кўплаб ҳужжатлар имзоланиши режалаштирилган.
Хабар беришларича, Ўзбекистон делегациясининг Истанбул шаҳрига ташриф буюриши ҳам мўлжалланган.
Маълумот учун, Президент Шавкат Мирзиёев Туркияга россиялик миллиардер Алишер Усмоновдан ижарага олинган «Бурҳон» самолётида парвоз қилди. «Ўзбекистон ҳаво йўллари» миллий авиакомпанияси миллиардернинг самолёти Ўзбекистон Президентининг узоқ масофаларга мўлжалланган парвозлари учун «амалдаги бозор нархлари бўйича тижорат шартлари асосида» ижарага олинганини маълум қилган эди.
Изоҳ (0)