Mirobod tuman jinoyat ishlari bo‘yicha sudida Borovskiy nomidagi kollej o‘quvchisi Jasur Ibrohimovning ishi yuzasidan yana bir guvoh — qurilishda bo‘yoqchi bo‘lib ishlovchi va o‘sha kuni o‘smirlarning janjaliga guvoh bo‘lgan Mira’lo Temirov ko‘rsatma berdi, deya xabar qildi “Novosti Uzbekistana”.
Temirovning sudga ma’lum qilishicha, o‘sha kunda, ya’ni 3-may sanasida u odatdagidek ishda bo‘lgan — obyekt devorlarini bo‘yash bilan shug‘ullangan. Bo‘yoqchi 2 metr balandlikda qurilish havozalari yordamida ishlayotgan bo‘lganligi sabab, janjal sodir bo‘lgan joy unga ko‘rinib turgan. U voqea joyidan 15—20 metr uzoqlikda ishlagan.
“Men yonimdan 5—6 nafar o‘smir o‘tib ketganini ko‘rdim. O‘girilib qaraganimda ular o‘zaro urushayotganini, bir-birini tepayotganini ko‘rdim. Bundan tashqari yerda bir bola yotardi. Uning burnidan qon oqayotgan edi. Shundan so‘ng urushayotganlarni ajratib tashlashdi. Bolalardan biri suv olib kelgani ketdi. Keyin men havozadan pastga tushdim. Yerdan turg‘izishgan bola yuz-qo‘llarini yuvib, ust-boshini qoqdi va ular tarqalib ketishdi”, — dedi guvoh.
Bo‘yoqchi o‘zining ko‘rsatmasida ta’kidlashicha, u janjal boshini va oxirini ko‘rgan, shu bilan birga qayd etishicha, faqatgina ikki kishi urushgan, qolganlar atrofda turib tomosha qilgan. Temirovning so‘zlariga ko‘ra, ulardan biri boshqasining qorni atrofiga tepgan. Urush 5—7 daqiqa davom etgan. Yigitlar voqea joyida umumiy miqdorda 15—20 daqiqa bo‘lishgan.
Sudning savollariga javob bergan guvohning ta’kidlashicha, u marhumning oilasini ham, ayblanuvchining oilasini ham tanimaydi va uning ko‘rsatmalariga hech kim bosim o‘tkazmagan, u o‘z ko‘zlari bilan ko‘rganini so‘zlagan.
Nega guvoh urushayotgan o‘smirlarni to‘xtatmadi, deya berilgan savolga Temirovning aytishicha, u yigitlarga qarab baqirgan, biroq uni hech kim eshitmagan va e’tibor bermagan. Shuningdek, uning ma’lum qilishicha, Jasur voqea joyidan o‘zi mustaqil ravishda yurib ketgan. Bo‘yoqchining so‘zlariga ko‘ra, u urushayotganlarning ko‘rinishini yaxshi eslab qolgan, boshqalarni esa — yo‘q. Sudning “yana kimdir o‘smirlarning urushganiga guvoh bo‘lgan bo‘lishi mumkinmi”, deya bergan savoliga Temirov “boshqa guvohlarni ko‘rmadim”, deb javob qaytardi.
Izoh (0)