Миробод туман жиноят ишлари бўйича судида Боровский номидаги коллеж ўқувчиси Жасур Иброҳимовнинг иши юзасидан яна бир гувоҳ — қурилишда бўёқчи бўлиб ишловчи ва ўша куни ўсмирларнинг жанжалига гувоҳ бўлган Мираъло Темиров кўрсатма берди, дея хабар қилди «Новости Узбекистана».
Темировнинг судга маълум қилишича, ўша кунда, яъни 3 май санасида у одатдагидек ишда бўлган — объект деворларини бўяш билан шуғулланган. Бўёқчи 2 метр баландликда қурилиш ҳавозалари ёрдамида ишлаётган бўлганлиги сабаб, жанжал содир бўлган жой унга кўриниб турган. У воқеа жойидан 15—20 метр узоқликда ишлаган.
«Мен ёнимдан 5—6 нафар ўсмир ўтиб кетганини кўрдим. Ўгирилиб қараганимда улар ўзаро урушаётганини, бир-бирини тепаётганини кўрдим. Бундан ташқари ерда бир бола ётарди. Унинг бурнидан қон оқаётган эди. Шундан сўнг урушаётганларни ажратиб ташлашди. Болалардан бири сув олиб келгани кетди. Кейин мен ҳавозадан пастга тушдим. Ердан турғизишган бола юз-қўлларини ювиб, уст-бошини қоқди ва улар тарқалиб кетишди», — деди гувоҳ.
Бўёқчи ўзининг кўрсатмасида таъкидлашича, у жанжал бошини ва охирини кўрган, шу билан бирга қайд этишича, фақатгина икки киши урушган, қолганлар атрофда туриб томоша қилган. Темировнинг сўзларига кўра, улардан бири бошқасининг қорни атрофига тепган. Уруш 5—7 дақиқа давом этган. Йигитлар воқеа жойида умумий миқдорда 15—20 дақиқа бўлишган.
Суднинг саволларига жавоб берган гувоҳнинг таъкидлашича, у марҳумнинг оиласини ҳам, айбланувчининг оиласини ҳам танимайди ва унинг кўрсатмаларига ҳеч ким босим ўтказмаган, у ўз кўзлари билан кўрганини сўзлаган.
Нега гувоҳ урушаётган ўсмирларни тўхтатмади, дея берилган саволга Темировнинг айтишича, у йигитларга қараб бақирган, бироқ уни ҳеч ким эшитмаган ва эътибор бермаган. Шунингдек, унинг маълум қилишича, Жасур воқеа жойидан ўзи мустақил равишда юриб кетган. Бўёқчининг сўзларига кўра, у урушаётганларнинг кўринишини яхши эслаб қолган, бошқаларни эса — йўқ. Суднинг «яна кимдир ўсмирларнинг урушганига гувоҳ бўлган бўлиши мумкинми», дея берган саволига Темиров «бошқа гувоҳларни кўрмадим», деб жавоб қайтарди.
Изоҳ (0)