Facebook ijtimoiy tarmog‘ining ko‘plab guruhlarida joriy yilning iyulida Sergeli tumanida bir qizga pichoq orqali jarohat yetkazgan erkakka nisbatan “uch yilga ozodlikdan cheklash” jazosi qo‘llanilgani keng muhokama qilinmoqda, deb xabar berdi “Novosti Uzbekistana”.
Shubhali akkaunt tomonidan jinoyatchi juda ham yengil jazo olgani haqida qoldirilgan post ijtimoiy tarmoq bo‘ylab yashin tezligida tarqaldi. Post muallifi ushbu xabarni keng tarqalishiga va qandaydir choralar ko‘rilishida yordam so‘ragan.
“Jabrlanuvchining nomidan. Salom, 27-iyulda Sergeli tumanida bir qizga pichoq orqali yetkazilgan jarohat voqeasini eslasangiz kerak. Tasavvur qiling, ushbu ijtimoiy xavfli odamga 3 yil uy qamog‘i tayinlashibdi, ya’ni unga umuman jazo berishmabdi!.. ayni vaqtda u hayotimga tahdid solmoqda. Hukumatimiz qayerga qarayapti?! U barcha uchun xavfli! Men adolat istayman! Xabarda maksimal darajada tarqatishga yordam bering! Meni e’tiborsiz qoldirmang. U bundan oldin ham shu turdagi modda bilan sudlangan, bu ishni shunday qoldirib bo‘ladimi axir?!”, — deyiladi xabarda.
Izoh qoldiruvchilarning asosiy qismi o‘zini qiziqqon tutgan — bir qismi bu kabi jazo tayinlagan sudyani ayblagan bo‘lsa, qolganlari Sergeli IIBB tergovchisini poraxo‘rlikda qoralagan. Ayrimlar hatto petitsiya yozishga ham chaqirgan.
Toshkent shahar IIBB ushbu voqeaga e’tibor qaratdi. Ish qaytadan ko‘tarildi, barcha materiallar diqqat bilan o‘rganib chiqildi va yuqoridagi post o‘z xodimlari nomida yog‘dirilgan mutlaq tuhmat degan xulosaga keldi.
“Sergeli tumani tergovchisi o‘z sha’niga tuhmat yog‘dirgan odamlarga nisbatan qonuniy chora ko‘rish bo‘yicha raport bilan murojaat qildi. Biz bu odamlar topilib va ularga nisbatan chora ko‘rishlari uchun raportni qabul qilib olib, shahar prokuraturasiga topshirdik. Agar ularda bizning xodimimiz ayblanuvchidan qandaydir mukofot olganini isbotlovchi dalillar bo‘lsa, marhamat taqdim etishsin. Bizda tuhmat uchun modda bor — O‘zbekiston Respublikasi Jinoyat Kodeksining 139-moddasi. Ushbu holatda tergovchi aniq pora olishda ayblangan. Biz buning tuhmat ekanligini isbotlash niyatidamiz”, — deydi Toshkent shahar IIBB boshlig‘i o‘rinbosari Doniyor Toshxo‘jayev.
Iyul oyida sodir bo‘lgan noxush hodisa yuzasidan jurnalistlarga jinoyat ishining ayrim materiallari, xususan, o‘sha kafedagi kuzatuv kameralari yozib olgan videolar taqdim etildi.
Video qahramonlari kadrda soat 9 larda paydo bo‘lgan. Voqeaning o‘zi esa ertalabki soat 10 lar atrofida sodir etilgan. Ko‘rinishidan mast ekanligi bilinib turgan yosh qiz tetiklanishga qaror qilgan ko‘rinadi shekilli, yerda yotgan shlangni olib suvni turli tomonga sepa boshlaydi. Qiz sepayotgan suvlar keyinroq, u uchun mutlaqo notanish bo‘lgan odamga tegadi. Erkak o‘rnidan turib, tashqari yugurib chiqqan holda xo‘l bo‘lgan ko‘ylagini qizga ko‘rsatib baqirgan. Shu vaqt orasida qizning do‘stlari erkakga tashlanib qolgan. Erkak esa cho‘ntagidan kichkina yig‘ma pichoqni chiqarib qizning yelkasiga sanchgan — oqibatda uzunligi 6—7 santimetr keladigan unchalik chuqur bo‘lmagan jarohat paydo bo‘lgan.
IIBB vakillarining so‘zlariga ko‘ra, erkakka nisbatan jinoyat kodeksining 277-moddasi 3-qismi “Bezorilik” bo‘yicha jinoyat ishi ochilgan va sud tomonidan 3 yilga ozodlikdan cheklash jazosi tayinlangan. Unga ko‘ra, ayblanuvchi soat 20:00 dan ertalabki soat 7:00 gacha doimiy yashash joyida bo‘lishi, ommaviy tadbirlarga bormasligi, spirtli ichimliklar ichmasligi, doimiy ravishda mahalla posboni ro‘yxatidan o‘tib turishi va boshqa shu kabi cheklovlarga amal qilishi kerak.
IIBB boshlig‘i o‘rinbosarining qayd etishicha, jinoyat sodir etilguniga qadar ko‘p sonli guvohlardan hech biri qizni tinchlantirishga harakat qilib, jinoyatning oldini olmagan — na kafega tashrif buyurganlar va na muassasa ma’muriyati.
Izoh (0)