Falastinning “Fath” va “HAMAS” tashkilotlari Qohirada sulh shartnomasini imzoladi. Bu haqda, Al Jazeera telekanaliga asoslanib, “TASS” xabar bermoqda.
Hujjat ikki fraksiya o‘rtasida Misr razvedkasi vakillari ishtirokida imzolandi.
Kelishuvga binoan, milliy yarashuv hukumati Falastin hududlarida — Iordan daryosining g‘arbiy sohili va G‘azo sektorida 1-dekabrga qadar vakolatni to‘liq o‘z zimmasiga oladi. Bundan tashqari, tomonlar Misr va G‘azo chegarasidagi Rafax chegara terminalini G‘arbiy sohildagi Falastin ma’muriyatiga bo‘ysunadigan prezident gvardiyasiga topshirishga kelishib oldi.
2007-yil iyulida “HAMAS” G‘azo sektorini kuch bilan egallaganidan so‘ng Falastin ozodlik harakatida bo‘linish yuz bergan edi. Shundan buyon sohilbo‘yi anklav islomiy harakat nazorati ostida, G‘arbiy sohil esa jahon hamjamiyati tan oladigan Mahmud Abbos ma’muriyati tomonidan boshqarib kelinmoqda. Shundan buyon birinchi marta tomonlar yarashuvga keldi.
Izoh (0)