Qozog‘iston tashqi ishlar vazirligi Qirg‘iziston prezidenti Almazbek Atambayev bildirgan fikrlar yuzasidan bayonot berdi. Bu haqda Tengrinews ma’lum qildi.
“Qozog‘iston TIV Qirg‘iziston prezidenti Almazbek Atambayevning 7-oktabrda Qozog‘iston rahbariyatiga nisbatan bildirgan va qirg‘iz OAVlarida tarqatilgan fikrlari yuzasidan qat’iy norozilik bildiradi. Ularni ikki do‘st davlatlar o‘rtasidagi munosabatlar uchun yo‘l qo‘yib bo‘lmaydigan holat deb hisoblaydi”, — deyiladi bayonotda.
“Qirg‘iziston prezidentining saylovoldi maqsadlaridagi mas’uliyatsiz, yolg‘on va mohiyatiga ko‘ra fitna qo‘zg‘ovchi da’volari mamlakatlarimiz o‘rtasidagi ko‘p asrlik va o‘zaro yordamga asoslangan rishtalarga ziyon yetkazmasligiga umid bildiramiz. Qozog‘iston tomoni qirg‘iz xalqi bilan an’aviy birodarlik munosabatlarini rivojlantirishga sodiq qoladi”, — deya ta’kidlanadi Qozog‘iston TIV bayonotida.
Eslatib o‘tamiz, Qirg‘iziston prezidenti Almazbek Atambayev Qozog‘iston rasmiylarini respublikaning ichki ishlari, jumladan, 15-oktabrda bo‘lib o‘tadigan prezidentlik saylovlariga aralashishda ayblagan edi.
Izoh (0)