Қозоғистон ташқи ишлар вазирлиги Қирғизистон президенти Алмазбек Атамбаев билдирган фикрлар юзасидан баёнот берди. Бу ҳақда Tengrinews маълум қилди.
«Қозоғистон ТИВ Қирғизистон президенти Алмазбек Атамбаевнинг 7 октябрда Қозоғистон раҳбариятига нисбатан билдирган ва қирғиз ОАВларида тарқатилган фикрлари юзасидан қатъий норозилик билдиради. Уларни икки дўст давлатлар ўртасидаги муносабатлар учун йўл қўйиб бўлмайдиган ҳолат деб ҳисоблайди», — дейилади баёнотда.
«Қирғизистон президентининг сайловолди мақсадларидаги масъулиятсиз, ёлғон ва моҳиятига кўра фитна қўзғовчи даъволари мамлакатларимиз ўртасидаги кўп асрлик ва ўзаро ёрдамга асосланган ришталарга зиён етказмаслигига умид билдирамиз. Қозоғистон томони қирғиз халқи билан анъавий биродарлик муносабатларини ривожлантиришга содиқ қолади», — дея таъкидланади Қозоғистон ТИВ баёнотида.
Эслатиб ўтамиз, Қирғизистон президенти Алмазбек Атамбаев Қозоғистон расмийларини республиканинг ички ишлари, жумладан, 15 октябрда бўлиб ўтадиган президентлик сайловларига аралашишда айблаган эди.
Изоҳ (0)