Las-Vegasdagi musiqa festivaliga Kaliforniyaning Orinj okrugidan sakkiz nafar oila a’zolari bilan birga hordiq chiqarish uchun kelgan, uch farzandning otasi bo‘lmish 30 yoshli Jonatan Smit akasi bilan birga o‘nlab kishilarni qutqarib qoldi, deb yozadi TJournal. Endi uni qahramon deb atashmoqda.
Avtomatik qurol tovushi eshitilgan vaqtda Smit qarindoshlari bilan tomoshabinlarning birinchi qatorlarida turgan edi. Voqea jiddiyligini tushungach, Smitning akasi barcha qarindoshlarga bir-birining qo‘lidan tutib, yugurishni buyurdi. Jonatanning uch jiyani olomonga aralashib yo‘qolib qoldi, ularni ko‘rish uchun yigit sahnaga chiqdi ammo hech kimni topa olmadi.
Smit yugurib ketayotib, yo‘l-yo‘lakay bir necha kishini qo‘lidan tortib, o‘zi bilan olib ketdi va ular bilan birga nogironlar uchun avtoturargohdagi oxirgi qator ortiga bekinib oldi.
Jonatan ochiq joyda sarosima holatida qotib qolgan bir nechta qizni ko‘rib qoldi va ularni panaga olib kelish uchun yugurib chiqqanida bo‘yniga o‘q kelib tegdi.
Yigitni festivalga dam olish uchun kelgan san-diyegolik politsiyachi kasalxonaga yetkazdi. Smit Las-Vegasga kelgan barcha qarindoshlari sog‘-omonligi haqida o‘sha yerda xabar topdi.
Jonatanning o‘mrov suyagi singani, qovurg‘asi darz ketgani va o‘pkasi lat yegani ma’lum bo‘ldi.
OAVlar yozishicha, u festivalda 30 ga yaqin kishini qutqarib qolgan. Jonatanning surati ijtimoiy tarmoqlarda mashhur bo‘lib ketdi, uni qahramon deb atashmoqda. Ammo u bunday fikrda emas.
“Men o‘zimni qahramon deb his qilmayapman. Keyinchalik kimdir men uchun ham shunday ish qilishini istagan bo‘lardim. Hech kim o‘limga loyiq emas, ustiga-ustak, musiqa festivaliga kelganida”, — dedi Jonatan Smit.
Izoh (0)