Лас-Вегасдаги мусиқа фестивалига Калифорниянинг Оринж округидан саккиз нафар оила аъзолари билан бирга ҳордиқ чиқариш учун келган, уч фарзанднинг отаси бўлмиш 30 ёшли Жонатан Смит акаси билан бирга ўнлаб кишиларни қутқариб қолди, деб ёзади TJournal. Энди уни қаҳрамон деб аташмоқда.
Автоматик қурол товуши эшитилган вақтда Смит қариндошлари билан томошабинларнинг биринчи қаторларида турган эди. Воқеа жиддийлигини тушунгач, Смитнинг акаси барча қариндошларга бир-бирининг қўлидан тутиб, югуришни буюрди. Жонатаннинг уч жияни оломонга аралашиб йўқолиб қолди, уларни кўриш учун йигит саҳнага чиқди аммо ҳеч кимни топа олмади.
Смит югуриб кетаётиб, йўл-йўлакай бир неча кишини қўлидан тортиб, ўзи билан олиб кетди ва улар билан бирга ногиронлар учун автотураргоҳдаги охирги қатор ортига бекиниб олди.
Жонатан очиқ жойда саросима ҳолатида қотиб қолган бир нечта қизни кўриб қолди ва уларни панага олиб келиш учун югуриб чиққанида бўйнига ўқ келиб тегди.
Йигитни фестивалга дам олиш учун келган сан-диеголик полициячи касалхонага етказди. Смит Лас-Вегасга келган барча қариндошлари соғ-омонлиги ҳақида ўша ерда хабар топди.
Жонатаннинг ўмров суяги сингани, қовурғаси дарз кетгани ва ўпкаси лат егани маълум бўлди.
ОАВлар ёзишича, у фестивалда 30 га яқин кишини қутқариб қолган. Жонатаннинг сурати ижтимоий тармоқларда машҳур бўлиб кетди, уни қаҳрамон деб аташмоқда. Аммо у бундай фикрда эмас.
«Мен ўзимни қаҳрамон деб ҳис қилмаяпман. Кейинчалик кимдир мен учун ҳам шундай иш қилишини истаган бўлардим. Ҳеч ким ўлимга лойиқ эмас, устига-устак, мусиқа фестивалига келганида», — деди Жонатан Смит.
Изоҳ (0)