Qirg‘iziston shartnoma asosida xizmat qiluvchilarni Suriyaga yuborish masalasini ko‘rib chiqishi mumkin

Qirg‘iziston Suriyadagi deeskalatsiya hududlariga o‘z harbiylarini yuborish bo‘yicha hech qanday rasmiy taklif olmagan. Bishkek shartnoma asosida xizmat qiluvchilarni u yerga yuborishni qayta ko‘rib chiqishi mumkin. Bu haqda Qirg‘iziston bosh vaziri Sapar Isakovga asoslanib, “RIA Novosti” xabar berdi.

Joriy yilning yozida Turkiya prezidenti vakili Ibrohim Qalin Rossiya tomoni Suriyadagi deeskalatsiya hududlariga Qirg‘iziston va Qozog‘iston harbiylarini yuborish taklifini ilgari surgani haqida ma’lum qilgandi. Davlat dumasining mudofaa bo‘yicha qo‘mitasi rahbari Vladimir Shamanov Rossiya Suriyaga harbiylarni yuborish bo‘yicha ushbu ikki davlat bilan muzokaralar olib borayotganini tasdiqlagan.

“Biz Suriyaga harbiylarni jo‘natish bo‘yicha rasmiy taklif olmaganmiz. Biroq agarda biz, rasmiy taklifni oldik, deya hisoblasak, albatta, ushbu masalani KXShT doirasida ko‘rib chiqish va qandaydir qaror qabul qilish lozim. Ko‘rinishidan bunga BMT Xavfsizlik kengashi doirasida aniq yechim bo‘lishi kerak. Ammo ta’kidlash kerakki, biz o‘z harbiylarimizni yubora olmaymiz. Biz u yerga shartnoma asosida xizmat qiluvchilarni yuborishni ko‘rib chiqishimiz mumkin”, — dedi Isakov.

Isakovning xabar qilishicha, ushbu mavzu Qirg‘izistonda muhokama qilinmagan, bu boradagi qarorni mamlakat parlamenti qabul qilishi kerak.