Қирғизистон Суриядаги деэскалация ҳудудларига ўз ҳарбийларини юбориш бўйича ҳеч қандай расмий таклиф олмаган. Бишкек шартнома асосида хизмат қилувчиларни у ерга юборишни қайта кўриб чиқиши мумкин. Бу ҳақда Қирғизистон бош вазири Сапар Исаковга асосланиб, «РИА Новости» хабар берди.
Жорий йилнинг ёзида Туркия президенти вакили Иброҳим Қалин Россия томони Суриядаги деэскалация ҳудудларига Қирғизистон ва Қозоғистон ҳарбийларини юбориш таклифини илгари сургани ҳақида маълум қилганди. Давлат думасининг мудофаа бўйича қўмитаси раҳбари Владимир Шаманов Россия Сурияга ҳарбийларни юбориш бўйича ушбу икки давлат билан музокаралар олиб бораётганини тасдиқлаган.
«Биз Сурияга ҳарбийларни жўнатиш бўйича расмий таклиф олмаганмиз. Бироқ агарда биз, расмий таклифни олдик, дея ҳисобласак, албатта, ушбу масалани КХШТ доирасида кўриб чиқиш ва қандайдир қарор қабул қилиш лозим. Кўринишидан бунга БМТ Хавфсизлик кенгаши доирасида аниқ ечим бўлиши керак. Аммо таъкидлаш керакки, биз ўз ҳарбийларимизни юбора олмаймиз. Биз у ерга шартнома асосида хизмат қилувчиларни юборишни кўриб чиқишимиз мумкин», — деди Исаков.
Исаковнинг хабар қилишича, ушбу мавзу Қирғизистонда муҳокама қилинмаган, бу борадаги қарорни мамлакат парламенти қабул қилиши керак.
Изоҳ (0)