Business Insider nashri yozishicha, Las-Vegasdagi festival tashrifchilarini o‘qqa tutgan Stiven Peddokning otasi uzoq vaqt davomida qidiruvda bo‘lgan. 1969—1977-yillarda Benjamin Xoskins Peddok AQShdagi eng xavfli jinoyatchilar ro‘yxatiga kirgan, deya xabar bermoqda “RBK”.
Ta’kidlanishicha, shifokorlar katta Peddokni rasman o‘z joniga qasd qilishga moyil bo‘lgan psixopat deb tan olgan, u banklarni o‘margan va avtomobillarni olib qochgan. Arizonadagi banklarga uyushtirilgan bir nechta qurolli hujumlardan so‘ng u sudga berilgan va 20 yilga qamalgan. Ammo 1969-yilda katta Peddok qamoqdan qochgan va uzoq vaqt davomida qidiruvda bo‘lgan.
1980-yillarda u go‘yoki yangi hayot boshlamoqchi bo‘lgan, biroq oxir-oqibat uning tovlamachiligi fosh qilingan. Bir necha yil avval katta Peddok vafot etgan.
Politsiyachilar kichik Peddok musiqa festivali tashrifchilarini tartibsiz o‘qqa tutishi sababini hamon tushuna olmayotgani uchun, uning otasi biografiyasini o‘rganib chiqmoqda. Kichik Peddokning o‘zi jinoyatni sodir etgandan so‘ng mehmonxona xonasiga bekinib olib, o‘z joniga qasd qilgan.
Avvalroq Las-Vegasdagi otishmada halok bo‘lganlar soni 59 kishiga yetgani xabar berilgan edi.
Otishma uchun javobgarlikni IShID o‘z zimmasiga oldi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)