Лас-вегаслик қотилнинг отаси «хавфли психопат» бўлиб чиқди

Business Insider нашри ёзишича, Лас-Вегасдаги фестиваль ташрифчиларини ўққа тутган Стивен Пэддокнинг отаси узоқ вақт давомида қидирувда бўлган. 1969—1977 йилларда Бенжамин Хоскинс Пэддок АҚШдаги энг хавфли жиноятчилар рўйхатига кирган, дея хабар бермоқда «РБК».

Таъкидланишича, шифокорлар катта Пэддокни расман ўз жонига қасд қилишга мойил бўлган психопат деб тан олган, у банкларни ўмарган ва автомобилларни олиб қочган. Аризонадаги банкларга уюштирилган бир нечта қуролли ҳужумлардан сўнг у судга берилган ва 20 йилга қамалган. Аммо 1969 йилда катта Пэддок қамоқдан қочган ва узоқ вақт давомида қидирувда бўлган.

1980 йилларда у гўёки янги ҳаёт бошламоқчи бўлган, бироқ охир-оқибат унинг товламачилиги фош қилинган. Бир неча йил аввал катта Пэддок вафот этган.

Полициячилар кичик Пэддок мусиқа фестивали ташрифчиларини тартибсиз ўққа тутиши сабабини ҳамон тушуна олмаётгани учун, унинг отаси биографиясини ўрганиб чиқмоқда. Кичик Пэддокнинг ўзи жиноятни содир этгандан сўнг меҳмонхона хонасига бекиниб олиб, ўз жонига қасд қилган.

Аввалроқ Лас-Вегасдаги отишмада ҳалок бўлганлар сони 59 кишига етгани хабар берилган эди.

Отишма учун жавобгарликни ИШИД ўз зиммасига олди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.