Xalq deputatlari Namangan shahar kengashi deputatligiga bo‘shab qolgan o‘ringa saylovlar arafasidagi uchrashuvda aholi tomonidan 75-maktab yaqinida svetofor o‘rnatish masalasi ko‘tarilgandi. Bu haqda “Daryo” muxbiri xabar bermoqda.
“Namangan—Uchqo‘rg‘on” avtomagistral yo‘li ustida joylashgan ushbu manzildan bir soatda o‘rtacha 2,5 ming avtomobil o‘tadi. Piyodalar o‘tish joyini esa 500 dan ortiq yo‘lovchi kesib o‘tadi. Mazkur hududda yashovchi fuqarolarning guvohlik berishicha, gavjum yo‘lda yil davomida 8 avtotansport hodisasi sodir etilgan. 5 nafar fuqaro olamdan o‘tgan, 3 yo‘lovchi jarohat olgan.
Deputatlikka nomzodlardan biri — “Namangan kitob olami” MChJ direktori Ma’ruf Mo‘minov saylanishi yoki yo‘qligidan qat’i nazar, masalani ijobiy hal etishga va’da berdi.
28-Yakkatut saylov okrugidan xalq deputatlari Namangan shahar kengashiga saylovda Ma’ruf Mo‘minov eng ko‘p ovoz oldi. O‘sha zahoti tegishli mutasaddilarga uchradi, o‘zi ham bevosita ish ustida bo‘ldi. Piyodalar yo‘lkasi rangli bo‘yoq bilan ajratildi. Maktabga yaqin hududga tezlikni cheklovchi yo‘l belgilari o‘rnatildi. Maktab qarshisida esa aholi talabiga muvofiq svetofor o‘rnatildi.
Izoh (0)