Joriy yilning 3-avgust kuni 1958-yilda tug‘ilgan Sobirjon Ahmedov Ogayo shtatida istiqomat qiladigan qarindoshlarinikiga borish uchun Toshkentdan Nyu-Yorkka uchgani va u yerdagi Chayna-Taun avtobus bekatidan chipta sotib olganidan so‘ng, bedarak yo‘qolib qolgani haqida xabar berilgandi.
“Hozirchashu.com” saytining ma’lum qilishicha, oradan 55 kun o‘tgach, 27-sentabr kuni Sobirjon Ahmedov Manxetten kasalxonalarining birida ekanligi aniqlangan.
Kasalxonadagi shifokorlarning aniqlik kiritishicha, 6-avgust kuni kasalxona yaqinidan o‘tuvchi yo‘l chetida behush yotgan inson haqida xabar kelib tushgan. Tez yordam mashinasida bosh suyak qismi jarohati, chap yelka va chap qovurg‘alarning yopiq sinishi jarohati bilan “noma’lum shaxs” olib kelingan. Shifokorlarning sa’y-harakati bilan jarrohlik amaliyoti muvaffaqiyatli amalga oshirilgan.
35—40 kunlardan so‘ng bemor koma holatidan o‘ziga kelgan. Ammo vaziyatni tushuntirishga va o‘zi haqida ma’lumot bera olmagan (holsizlik va til bilmaslik sabab bo‘lishi mumkin). Bemor kasalxonada davolanishda davom etgan. 27-sentabr kuni ism-familiyasini qog‘ozda yozib bergan. Hamshira esa ushbu ism-sharif orqali Google’ga qidiruv bergan hamda ushbu shaxsni yaqinlari qidirayotganligini aniqlagan.
Ayni vaqtda Sobirjon Ahmedovning farzandi otasining yonida. U otasining taqdiriga befarq bo‘lmagan insonlarga o‘z minnatdorchiligini bildirgan.
Sobirjon Ahmedov qanday qilib shaharning bu nuqtasiga kelib qolganligini eslay olmadi. Shifokor Ahmedov yo‘l-transport hodisasi sababli jarohat olgan bo‘lishi mumkinligini taxmin qildi. Hozirda uning ahvoli ancha yaxshi. Kasalxonada davolanishda davom etadi. Shifokorlar keyingi haftada kichik jarrohlik amaliyotini amalga oshirishlari haqida aytib o‘tgan. Sobirjon Ahmedov 25—30 kunlardan so‘ng kasalxonadan chiqishi kutilmoqda.
Izoh (0)