Жорий йилнинг 3 август куни 1958 йилда туғилган Собиржон Аҳмедов Огайо штатида истиқомат қиладиган қариндошлариникига бориш учун Тошкентдан Нью-Йоркка учгани ва у ердаги Чайна-Таун автобус бекатидан чипта сотиб олганидан сўнг, бедарак йўқолиб қолгани ҳақида хабар берилганди.
«Hozirchashu.com» сайтининг маълум қилишича, орадан 55 кун ўтгач, 27 сентябрь куни Собиржон Аҳмедов Манхэттен касалхоналарининг бирида эканлиги аниқланган.
Касалхонадаги шифокорларнинг аниқлик киритишича, 6 август куни касалхона яқинидан ўтувчи йўл четида беҳуш ётган инсон ҳақида хабар келиб тушган. Тез ёрдам машинасида бош суяк қисми жароҳати, чап елка ва чап қовурғаларнинг ёпиқ синиши жароҳати билан «номаълум шахс» олиб келинган. Шифокорларнинг саъй-ҳаракати билан жарроҳлик амалиёти муваффақиятли амалга оширилган.
35—40 кунлардан сўнг бемор кома ҳолатидан ўзига келган. Аммо вазиятни тушунтиришга ва ўзи ҳақида маълумот бера олмаган (ҳолсизлик ва тил билмаслик сабаб бўлиши мумкин). Бемор касалхонада даволанишда давом этган. 27 сентябрь куни исм-фамилиясини қоғозда ёзиб берган. Ҳамшира эса ушбу исм-шариф орқали Google’га қидирув берган ҳамда ушбу шахсни яқинлари қидираётганлигини аниқлаган.
Айни вақтда Собиржон Аҳмедовнинг фарзанди отасининг ёнида. У отасининг тақдирига бефарқ бўлмаган инсонларга ўз миннатдорчилигини билдирган.
Собиржон Аҳмедов қандай қилиб шаҳарнинг бу нуқтасига келиб қолганлигини эслай олмади. Шифокор Аҳмедов йўл-транспорт ҳодисаси сабабли жароҳат олган бўлиши мумкинлигини тахмин қилди. Ҳозирда унинг аҳволи анча яхши. Касалхонада даволанишда давом этади. Шифокорлар кейинги ҳафтада кичик жарроҳлик амалиётини амалга оширишлари ҳақида айтиб ўтган. Собиржон Аҳмедов 25—30 кунлардан сўнг касалхонадан чиқиши кутилмоқда.
Изоҳ (0)