Ikki yashar Dilroz hozir o‘zi uchun juda katta bo‘lgan sinovdan o‘tayapti. Unga qon saratoni (OLL — o‘tkir leykoz) tashxisi qo‘yilganda qizaloq endigina bir yoshdan oshgandi.
Dilrozni birinchi marta shifoxonaga olib kelishganida ahvoli juda og‘ir edi. Shifokorlar qizaloqning kichkina jussasi saraton va o‘pka shamollashining og‘ir darajasi bilan kurashayotganini aniqlashdi. Unga kimyoterapiya buyurildi. Ammo bundan oldin o‘pkasi davolanishi lozimligi uchun, davolanishning katta kursini o‘tkazdi.
Shundan so‘ng Toshkent shahridagi “Qon quyish markazi” (Gemotologiya institutining 2-shifoxonasi)da birinchi kimyoterapiya o‘tkazildi. Jarayon 60 kundan ortiq davom etdi. Dilrozning onasi Nilufar kunu-tun qizining yonidan jilmadi. 26-may kuni ular shifoxonadan chiqishdi.
Hozirgi kungacha qizaloq yana bir necha marta kimyoterapiya oldi.
Ayni vaqtda uning ahvoli turg‘un. Shifokorlar yana bir necha marta kimyoterapiya olishi lozimligi va shundan keyin qo‘shimcha ravishda qo‘llab-quvvatlovchi davolash kursini o‘tashi lozimligini aytishmoqda. Shundan so‘ng u butkul sog‘ayishi mumkin.
Tashvish bir kelsa qo‘sha keladi, deyishgani rost ekan. Dilrozning birinchi kurs kimyoterapiyasi tugagach, ya’ni 26-may kuni uning otasi oilasidan voz kechdi. Holbuki, oldinda davolanishning asosiy qismi turgan edi. Ota qizalog‘ining tuzalib ketishiga ishonmadi va iqtisodiy yordam berishdan ham bosh tortdi va ajrashishini aytdi. Hozirda sud orqali aliment undirilmoqda. Afsuski, kollej o‘qituvchisi to‘layotgan aliment qimmat dorilar uchun yetarli emas.
— Yaxshi odamlar ko‘p ekan. Internet tarmog‘iga e’lon qo‘yilgach, ko‘plab yordamlar bo‘ldi, — deydi Dilrozning onasi Nilufar va yordam qo‘lini cho‘zgan hammaga o‘zining minnatorchiligini bildirdi. Ularning ko‘pchiligini tanimasligini, lekin hamisha ular uchun duoda ekanligini aytdi.Oldinda katta davolanish kursi turibdi. Yolg‘iz ona-bola uchun bu xarajatlar anchagina og‘irlik qilmoqda. Qolaversa, uzoq viloyatdan kelib poytaxtda yashash, ijara to‘lovlari ham oz emas.
Dilrozning onasi yaqin kungacha ish joyi va oyligi saqlangan holda imtiyozli mehnat ta’tilida edi. Shu kunlarda rahbariyat uni ishdan bo‘shatishlariga to‘g‘ri kelishini ma’lum qildi. Endi Nilufar ishsiz va maoshsiz.
Hozir Nilufar Toshkent shahridan ish izlamoqda. Iloji bo‘lsa, uyda o‘tirib qilinadigan ish topish niyatida. Chunki qizini uzoq vaqt qarovsiz qoldira olmaydi. Kasbi jurnalist va o‘qituvchi.
— Endi davolana boshlaganda Dilroz yaxshi gapira olmasdi. Hozir u qayeri og‘riyotganini o‘zi aytadi. Ayniqsa, kimyoviy muolajalardan keyin oyoqchasi va boshini ko‘rsatib, og‘riyotganini aytadi. U juda ham bardoshli qiz. Hozir ikkalamiz bir-birimizga yordam berishimiz, sabrli bo‘lib, hammasiga chidashimiz kerakligini aytsam, tushunadi. Dilrozning keyingi bosqichlarda davolanishi uchun katta mablag‘ zarur bo‘lmoqda, — deydi Dilrozning onasi Nilufar Xudoyberdiyeva.Balki Nilufarga o‘zi uchun mos biror ish topishiga yoki dori-darmon olishiga Sizning ham yordamingiz tegar. O‘z vaqtida davo choralari ko‘rilsa, ikki yoshli Dilroz, albatta, sog‘lom hayotga qaytadi. Bunga shifokorlar ham ishonch bildirishmoqda.
Quyida Dilroz uchun juda ham zarur dorilar ro‘yxati keltirilmoqda:
- Ambizon — 10 dona (1 donasi — 800 000 so‘m)
- Tromborasxodnik — 3 dona (1 donasi — 1 800 000 so‘m)
- Kuamen — 10 dona (1 donasi — 38 000 so‘m)
- Onkospar — 1 dona (200 AQSh dollar)
- Vankomitsin — 5 dona (1 donasi — 58 000 so‘m)
- Kyurapenam — 10 dona (1 donasi — 88 000 so‘m)
Bog‘lanish uchun telefon raqamlari: (+998-99) 828-66-26, (+998-90) 329-20-78.
Plastik karta raqami: 8600 0529 2729 8982 (“Mikrokreditbank”).
Izoh (0)