2017-yilgi Haj mavsumining yakunlari e’lon qilindi

Saudiya Arabistoni Madaniyat va axborot vazirligi 2017-yilgi Haj mavsumi yakunlarini e’lon qildi, deb xabar berdi “Farg‘onaziyo.uz”.

Vazirlik e’lon qilgan xabarga ko‘ra, bu yil 2 352 122 kishi muqaddas qadamjolarga haj ziyoratini amalga oshirish uchun borgan. Ularning 1,75 millioni — xorijiy davlat fuqarolaridir. 1 milliondan ortiq kishi Osiyo davlatlaridan tashrif buyurgan. Arab davlatlari hamkorlik kengashiga kirmaydigan mamlakatlardadan 400 ming nafar kishi, Afrika qit’asi davlatlaridan 200 ming kishi, Yevropa qit’asidan 100 ming kishi, AQSh va Avstraliyadan esa 25 ming nafar kishi haj ziyorati uchun tashrif buyurgan.

Bu yil haj borasidagi eng so‘nggi ma’lumotlar hojilarning mobil qurilmalariga yuborib turildi. Bundan tashqari, ularning har biri elektron identifikatsiyalangan bilaguzuklar bilan ta’minlandi.

Hojilarning xavfsizligi uchun fuqarolik mudofaasining 2280 nafar xodimi, shu bilan birga turli davlatlardan 2935 nafar ko‘ngilli xizmat qildi. Haj mavsumi jarayonlari esa 1650 nafar jurnalist tomonidan yoritib borildi. Hojilarga 30 ming malakali shifokorlar tibbiy xizmat ko‘rsatdi, ushbu mavsumda maxsus 15 ta tibbiy markazlar ochildi.