O‘zbekiston Prezidenti Shavkat Mirziyoyevning 2017-yil 2-sentabrdagi “Valyuta siyosatini liberallashtirish bo‘yicha birinchi navbatdagi chora-tadbirlar to‘g‘risida”gi Farmoniga asosan, 2017-yil 5-sentabrdan boshlab O‘zbekiston Respublikasi rezidentlari — jismoniy shaxslardan valyuta almashtirish shoxobchalarida erkin ravishda valyuta sotib olish boshlanadi.
Shuningdek, jismoniy shaxslar amaldagi tartibga muvofiq tijorat banklarining konversion bo‘limlarida xalqaro to‘lov kartalariga hisoblash asosida xorjiy valyuta sotib olishi va xorijda bu mablag‘dan hech qanday cheklovlarsiz foydalanishi mumkin.
2017-yil 5-sentabrdan boshlab O‘zbekiston Respublikasi yuridik shaxslariga tijorat banklarida cheklovlarsiz joriy xalqaro operatsiyalar bo‘yicha (mahsulotlar, ishlar va xizmatlar importi, daromadlarni repatriatsiya qilish, kreditlarni to‘lash, ish bo‘yicha safar xarajatlari va boshqa nosavdo xarakteridagi o‘tkazmalar) xorijiy valyuta sotib olish huquqi beriladi.
Yuridik shaxsni tashkil qilmasdan oziq-ovqat importi bilan shug‘ullanuvchi yakka tartibdagi tadbirkorlarga 5-sentabrdan boshlab, jismoniy shaxslar uchun o‘rnatilgan tartibda, bank hisob raqami orqali xorijiy valyuta sotib olishga ruxsat beriladi.
Shuningdek, eksportchilarga, ularning mulk shaklidan qat’i nazar, xorijiy valyutada olingan daromadning ma’lum qismini majburiy sotish talabi bekor qilinadi.
Farmonga ko‘ra, 5-sentabrdan e’tiboran xorijiy valyutada daromadga ega bo‘lgan va yuridik shaxsni tashkil etmasdan tadbirkorlik faoliyatini amalga oshiruvchilar, shuningdek, fermer xo‘jaliklari o‘z bank hisob raqamlaridan xorijiy valyutani naqd ko‘rinishda olishi mumkin.
Izoh (0)