“O‘zbekenergo” aksiyadorlik jamiyati “Tolimarjon IESni 450 MVtlik ikkita bug‘-gaz qurilmasi qurish bilan kengaytirish” investitsiya loyihasini amalga oshirdi. Bu haqda “O‘zbekiston24” xabar bermoqda.
Janubiy Koreyaning Hyundai va Daewoo kompaniyalari konsorsiumi bug‘-gaz qurilmalari qurilishida ishtirok etdi. Loyiha Osiyo taraqqiyot banki, Yaponiya xalqaro hamkorlik agentligi (JICA) va O‘zbekiston rekonstruksiya va taraqqiyot jamg‘armasi kredit mablag‘larini jalb qilgan holda amalga oshirildi.
1 va 2-energoblokning foydalanishga topshirilishi energotizim tejamkorligini elektr energiya ishlab chiqarishga yonilg‘i sarflanishini kamaytirish hisobiga oshirish imkonini beradi va yiliga 7,2 milliard kilovatt-soat qo‘shimcha elektr energiya ishlab chiqariladi. Shuningdek, Samarqand—Buxoro elektrouzeliga energiya yetkazishda yo‘qotishlar kamayadi.
Ayni vaqtda 2022-yilgacha yana shunday quvvatdagi ikkita bug‘-gaz qurilmasi qurilishi loyihasining texnik-iqtisodiy asoslanishi ishlab chiqilmoqda. Bu loyihaning amalga oshirilishi IES tomonidan ishlab chiqariladigan elektr energiya hajmini yiliga 20,4 milliard kilovatt-soatga yetkazish imkonini beradi.
Izoh (0)