Toshkent davlat yuridik universitetining 1-avgust kuni bo‘ladigan test imtihonlari jarayoni boshidan oxirigacha jonli efirda ko‘rsatib turilishi rejalashtirilgan. Bu haqda huquqshunos Xushnudbek Xudoyberdiyev “O‘zbekiston” telekanalining “Biz uchun muhim” tok-shousida ma’lum qildi.
Xudoyberdiyevning so‘zlariga ko‘ra, universitetning bu yilgi imtihonlari avvalgidek maktablar hududida emas, balki “O‘zekspomarkaz” milliy ko‘rgazmalar majmuasining to‘rtta katta pavilyonida bo‘lib o‘tadi.
“Har bir pavilyonda 1,5 ming nafardan abituriyent test yechadi. Xuddi Toshkentdagi Inha universitetidagidek. Imtihonda 100 dan ziyod kuzatuvchilar, xususan, prokuratura xodimlari bo‘ladi. Shuningdek, imtihon jarayonini ota-onalar va jurnalistlar kuzatib turishi mumkin”, — dedi Xushnudbek Xudoyberdiyev.
Avvalroq Toshkent davlat yuridik universitetida telefon, lug‘at va boshqa vositalarni olib kirishga uringan barcha abituriyentlar 1-avgust imtihonlaridan chetlatilishi e’lon qilingan edi.
Izoh (0)