Тошкент давлат юридик университетининг 1 август куни бўладиган тест имтиҳонлари жараёни бошидан охиригача жонли эфирда кўрсатиб турилиши режалаштирилган. Бу ҳақда ҳуқуқшунос Хушнудбек Худойбердиев «Ўзбекистон» телеканалининг «Биз учун муҳим» ток-шоусида маълум қилди.
Худойбердиевнинг сўзларига кўра, университетнинг бу йилги имтиҳонлари аввалгидек мактаблар ҳудудида эмас, балки «Ўзекспомарказ» миллий кўргазмалар мажмуасининг тўртта катта павильонида бўлиб ўтади.
«Ҳар бир павильонда 1,5 минг нафардан абитуриент тест ечади. Худди Тошкентдаги Инҳа университетидагидек. Имтиҳонда 100 дан зиёд кузатувчилар, хусусан, прокуратура ходимлари бўлади. Шунингдек, имтиҳон жараёнини ота-оналар ва журналистлар кузатиб туриши мумкин», — деди Хушнудбек Худойбердиев.
Аввалроқ Тошкент давлат юридик университетида телефон, луғат ва бошқа воситаларни олиб киришга уринган барча абитуриентлар 1 август имтиҳонларидан четлатилиши эълон қилинган эди.
Изоҳ (0)