Olmazordagi yong‘inda 2 ta dizel va 1 ta benzin rezervuari yonib ketdi

Toshkent shahar IIBB 27-iyulda Olmazor tumanida joylashgan yoqilg‘i-moy mahsulotlarini saqlash shoxobchasida yuz bergan yong‘in yuzasidan rasmiy bayonot berdi.

2017-yilning 27-iyul kuni soat 10:31 da Toshkent shahar IIBB YoXB Markaziy dispetcherlik xizmatiga Olmazor tumani, Bayroqtol ko‘chasi, 102-uyda joylashgan “12-sonli Trest” MChJ xo‘jalik hisobidagi mexanizatsiyalashtirish boshqarmasining Yoqilg‘i-moy mahsulotlarini saqlash shoxobchasida yong‘in sodir bo‘layotganligi haqida xabar tushgan.

Ushbu manzilga birinchi bo‘linmalar soat 10:32 da yetib borib, ko‘rilgan tezkor harakatlar natijasida yong‘in soat 10:48 da qurshab olinib, soat 11:02 da to‘liq bartaraf etilgan hamda yong‘in AYoQShni boshqa rezervuarlari va qo‘shni binolariga tarqalishining oldi olindi.

Toshkent shahar IIBB bayonoti

Bayonotda aytilishicha, yong‘in oqibatida ikkita rezervuarda dizel yoqilg‘isi hamda bitta konteynerli avtomobillarga yoqilg‘i quyish stansiyasida AI-80 markali benzin yoqilg‘isi yongan.

Xabar qilinishicha, yong‘in oqibatida jabrlanganlar yo‘q.