Tug‘ma yurak nuqsoni bilan tug‘ilgan, Amerikaga atigi 20 dollar bilan kelib, milliarderga aylangan Arnold Shvarseneggerning murakkab hayot yo‘li

Mashhur aktyor Arnold Shvarsenegger 2025-yil 30-iyul kuni 78 yoshini nishonlamoqda. Dastlab mohir bodibilder sifatida tanilgan aktyor “Terminator”, “Yirtqich” va “Qizil jazirama” kabi ajoyib jangari filmlardagi rollari tufayli xalqaro yulduzga aylandi. 2003-yildan 2011-yilgacha u Kaliforniya gubernatori bo‘lib ishlagan. Shvarseneggerning o‘zi bu vaqtni “hayotidagi eng yaxshi ishi” deb hisoblaydi, bu vaqt davomida u hatto o‘z xohishiga ko‘ra maosh olmagan.

Shvarseneggerning bolaligi

Arnold Shvarsenegger 1947-yilda Avstriyaning Grats yaqinidagi Tal qishlog‘ida tug‘ilgan — bolaligi qashshoqlikda o‘tgan. Ikkinchi jahon urushidan keyin uning oilasi ocharchilikdan qiynaladi, onasi esa fermalardan oziq-ovqat qidirardi. Otasi natsistlar partiyasining sobiq a’zosi Gustav Shvarsenegger urushdan depressiyaga tushib qaytgach, alamini oilasidan olib, zo‘ravonlik qila boshlaydi.

Arnold intizom va jismoniy faollikni talab qilgan otasining bosimiga uchraydi. Qiyinchiliklarga qaramay, ota-onaning qattiqqo‘lligi bo‘lajak bodibilderda sportga muhabbat uyg‘otadi. 14 yoshidan boshlab u bodibildingga qiziqib, otasining zulmi va qashshoqlikdan qutulish uchun mashhur sportchilardek bo‘lishni orzu qiladi. U voyaga yetganida ona yurtidagi barcha tengdoshlaridan kuchliroq edi.

Tank haydovchisidan “Dunyoning kelishgan yigiti”gacha

O‘n sakkiz yoshida Shvarsenegger ota-onasining uyini tark etib, armiyaga ketadi. Bu davr uning uchun juda yoqimsiz edi, u hatto o‘zi yoqtirgan ish bilan shug‘ullanish uchun kazarmada sport zali tashkil qiladi. Armiyada u tank haydovchisi ixtisosligini puxta egallagan, ammo uning harbiy texnikadan foydalanish ko‘nikmalari bir necha bor turli muammolarga olib kelgan. To‘qqiz oylik xizmatdan so‘ng, uning muddatidan oldin xizmatdan bo‘shatish haqidagi doimiy iltimoslari qondiriladi, chunki u komandirlarining joniga teggandi.

Demobilizatsiyadan so‘ng Shvarsenegger Germaniyaga ko‘chib o‘tadi — u yerda fitnes-klubda ishlab, polda yotib yuradi. Bu qiyin vaqtlar uning xarakteriga ta’sir qiladi: u ko‘pincha yoqimsiz vaziyatlarga tushib qolar, qarzga botgandi. Biroq u taslim bo‘lishni xayoliga ham keltirmaydi — 1966-yilda “Dunyoning kelishgan yigiti” tanlovida ikkinchi o‘rinni egallaydi va 1967-yilda u mutlaq g‘olib bo‘ladi.

Sog‘lig‘idagi muammolar

Arnold Shvarsenegger tug‘ma yurak nuqsoni bilan butun umri davomida kurashadi. 1997-yilda u aorta klapanini almashtirish bo‘yicha birinchi operatsiyasini o‘tkazadi, shundan so‘ng u ikki yil davomida filmlarda ko‘rinmaydi. Aktyor butun umri davomida oltita jarrohlik amaliyotini boshdan kechirgan, ulardan biri 2018-yilda jarrohlar xatoga yo‘l qo‘yib, ichki qon ketishiga va shoshilinch ochiq yurak jarrohlik amaliyotiga olib kelganida muvaffaqiyatsiz yakunlangan.

Shvarsenegger o‘z kitobida sog‘lig‘ini tiklash qanchalik qiyin bo‘lganini gapirib beradi. Avvaliga u uzoq davom etgan reabilitatsiya jarayonidan hafsalasi pir bo‘lgan va g‘azablangan, ammo keyin bu vaziyat haqida fikrini o‘zgartirgan. Arnold shifokorlardan uning tiklanish jarayonini tezlashtirishni so‘raydi: avvaliga u “xodunok”da, keyin esa tayoq bilan yurish mashqlarini boshlaydi. Natijada operatsiyadan atigi bir hafta o‘tib, uyiga qaytishga muvaffaq bo‘ldi va bir oy o‘tgach, uyda yengil mashqlar bilan shug‘ullana boshlaydi.

AQSHga ko‘chib o‘tish

1968-yilda 20 dollar bilan AQSHga ko‘chib o‘tgan Arnold Shvarsenegger o‘z faoliyatini fitnes jihozlarini suratga olgani va sotgani uchun olgan kichik gonorari bilan boshlagan. 

Uning “Gerkules Nyu Yorkda” debyuti muvaffaqiyatsiz tugaydi, keyinchalik u aktyorlik va ingliz tili kurslariga yoziladi. 30 yoshida Shvarsenegger o‘zining birinchi million dollarini filmlardan emas, balki Pumping Bricks qurilish kompaniyasi va ko‘chmas mulk bilan bog‘liq operatsiyalar orqali topgan.

Kinodagi muvaffaqiyati

Jangchi, o‘g‘ri, qaroqchi, qotil — Arnold Shvarseneggerning yulduzli karyerasi “Varvar Konan” va “Buzg‘unchi Konan” filmlari bilan boshlangan. Bu rollarda u baquvvat tanasi imkoniyatlaridan foydalanadi. 1983-yilda Jeyms Kemeron uni “Terminator” filmida bosh rolni o‘ynashga taklif qiladi.

Shvarsenegger butun film davomida atigi 18 ta jumla gapirganiga qaramay, bu film uni haqiqiy yulduzga aylantirdi. Undan keyin “Yirtqich”, “Kommandos” va “Terminator-2: Qiyomat kuni” kabi muvaffaqiyatli loyihalarda ishtirok etadi.

Shvarsenegger jangari film timsoliga aylanganidan so‘ng, “Egizaklar” va “Junior” filmida o‘ynagan holda komediyada o‘zini sinab ko‘rishdan qo‘rqmaydi. 2000-yillarning boshlariga kelib, uning gonorari har bir film uchun 22 milliondan 25 million dollargacha, “Terminator-3”da u 29 milliondan ko‘proq pul olgan.

Nikoh va siyosiy karyera

O‘zining xarizmasi va ko‘p sonli ishlari bilan tanilgan Arnold Shvarsenegger oxir-oqibat telejurnalist, AQSH elitasi a’zosi va Jon Kennedining jiyani Mariya Shrayverga uylanadi. Ular 1977-yilda bayram kechasida tanishishgandi.

Mariya do‘stlari va oilasining noroziligiga qaramay, 1986-yilda unga turmushga chiqadi. Mariya, dastlabki qarshiliklarga qaramay, Arnoldni barcha urinishlarida, shu jumladan, siyosiy karyerasida qo‘llab-quvvatlaydi. Shvarsenegger 2003-yildan 2011-yilgacha Kaliforniya gubernatori bo‘lgan va bu “hayotidagi eng yaxshi ish” ekanligini aytgan.

Janjalli ajralish

Shvarsenegger saylov oldidan jinsiy zo‘ravonlikda ayblanadi. G‘alaba qozonganiga qaramay, u o‘sha paytda o‘zini noto‘g‘ri tutganini tan oladi.

Uning Mariya Shrayver bilan nikohi 2011-yilda uy xizmatchisi bilan bo‘lgan yashirin munosabatlari oshkor bo‘lganidan so‘ng buziladi, undan nikohsiz o‘g‘li Jozef tug‘iladi. Shvarsenegger buni xotini va oilasidan 14 yildan ortiq yashirib kelgan.

Janjal natijasida Shrayver ajrashish uchun ariza beradi, farzandlari ham otasi bilan muloqot qilishni to‘xtatadi. Aktyor bu xiyonatini hayotidagi eng katta xato deb biladi.

Sobiq xotini bilan yarashishi

Arnold Shvarsenegger va Mariya Shrayver o‘rtasidagi ajralish jarayoni 10 yilga cho‘ziladi. Bu vaqt ichida aktyor sobiq xotini va bolalaridan kechirim so‘raydi. Hozirda ularning munosabatlari iliq va Mariya Arnoldning hayotidagi muhim shaxs bo‘lib qolmoqda.

Xotini bilan ajrashganidan keyin Shvarsenegger yolg‘iz yashaydi va uy hayvonlarini boqadi. Yoshi va sog‘lig‘i bilan bog‘liq muammolarga qaramay, u sport bilan shug‘ullanishda davom etadi va shifokorlarning ogohlantirishlariga e’tibor bermaydi, chunki faol hayot uning baquvvat bo‘lishiga yordam beradi.

Siyosiy karyerasi

Shvarsenegger siyosiy faoliyatini 2000-yillarning boshida boshlagan. 2003-yilda u Erik Greyder o‘rniga Kaliforniya gubernatori etib saylanadi. Respublikachilar partiyasi vakili bo‘lgan Shvarsenegger hokimiyatga kelgach, istiqbolli islohotlar va byudjet taqchilligiga qarshi kurash olib boradi.

U gubernator sifatida iqtisodiyot, atrof-muhit va sog‘liqni saqlash kabi masalalarga e’tibor qaratadi. Uning siyosati sog‘liqni saqlash tizimini isloh qilish va iqlim o‘zgarishiga qarshi kurashish, shuningdek, energiya siyosati masalalariga, jumladan, qayta tiklanadigan energiya manbalarini rag‘batlantirish bilan jiddiy shug‘ullanadi.

Shvarsenegger 2006-yilda ikkinchi muddatga saylanadi, biroq iqtisodiy inqiroz va maʼmuriyatining maqomi tufayli uning mashhurligi pasayadi. U 2011-yilda gubernatorlikdan ketadi, lekin turli tashabbuslarda qatnashib, atrof-muhit va sog‘liqni saqlash masalalarida nutq so‘zlaydi.

Boyligi

Forbes ma’lumotlariga ko‘ra, boyligi 1 milliard dollar bo‘lgan Arnold Shvarsenegger oqilona sarmoya qilish va tavakkal qila olish qobiliyati tufayli milliarderga aylandi. Avstriyaning Tal qishlog‘ida tug‘ilgan kambag‘al yigit kino va siyosatda muvaffaqiyatga erishdi, Gollivud cho‘qqisini zabt etib, Kaliforniya gubernatori lavozimini egalladi. Shvarsenegger ko‘chmas mulk, Starbucks va Google kabi turli bizneslarga faol sarmoya kiritadi.

Uning moliyaviy muvaffaqiyati, shuningdek, foydali bitimlardan ham keladi, masalan, “Egizaklar” filmining gonoraridan voz kechib, kassa tushumlarining 20 foizi ​​qo‘shiladi, bu unga ko‘proq daromad keltiradi. Shvarsenegger Pol Vaxter va Uorren Baffet kabi moliyaviy maslahatchilarning maslahati bilan qarz va investitsiya xatolaridan qochishni o‘rganadi.

Uning ba’zi sarmoyalari, masalan, Planet Hollywood restoranlar tarmog‘i muvaffaqiyatsiz bo‘lib chiqqan bo‘lsa-da, uning umumiy portfeli muvaffaqiyatli ko‘chmas mulk va venchur kapital loyihalarini, shuningdek, bir nechta yirik kompaniyalardagi xoldinglarni o‘z ichiga oladi. Shaxsiy qiyinchiliklarga va Mariya Shrayverdan ajrashganiga qaramay, Shvarsenegger faol ishlashda va rivojlanishda davom etmoqda.