“Daryo” internet-nashrida 22-iyul kuni O‘zbekiston davlat jahon tillari universitetida Xalqaro jurnalistika fakultetining ijodiy imtihoni bahosidan norozilik bildirgan fuqaroga kuch ishlatilgani haqida xabar berilgan edi. Facebook foydalanuvchisi Marhabo Aliyeva universitet xodimi uning “qo‘llarini qayirib, har xil haqoratli so‘zlar bilan haqoratlagani”ni ma’lum qilgan edi.
Mavzuga doir: O‘zbekiston davlat jahon tillari universitetida ijodiy imtihon bahosidan norozilik bildirgan fuqaroga kuch ishlatishdi (video)
Maqola nechta bo‘lishi kerak?
Abituriyent Regina Usmonova ilk ziddiyatli vaziyatga hujjatlarini topshirish jarayonidayoq duch kelgan. Qabul komissiyasining fakultet bo‘yicha mas’uli jurnalistik maqolalar yo‘qligi bois, Reginaning arizasi va hujjatlarini qabul qila olmasligini bildirgan. Abituriyent bu haqda bilmagani, ariza va hujjatlarga jurnalistik materiallar ham ilova qilinishi lozimligi haqida na O‘zDJTU saytida, na universitetdagi axborot burchaklarida va na “Abituriyentga eslatma” kitobchasida yozilganini aytgach, mas’ul shaxs bu universitetning “yozilmagan qoidasi” ekanini ma’lum qilgan.
Mas’ul shaxsning Regina Usmonovaga tushuntirishicha, maqola ikkinchi ijodiy imtihon — og‘zaki suhbat uchun zarurligi, suhbat o‘sha maqola asosida olib borilishini, qo‘shimchasiga, maqola ijodiy imtihonda baho qo‘yishda hisobga olinishini aytgan. Uzoq tortishuvdan so‘ng, qabul komissiyasining fakultet bo‘yicha mas’uli “keyingi o‘n kun ichida kamida bitta maqola olib kelish” sharti bilan abituriyentning hujjatlarini qabul qilgan.
Regina Usmonova 3-iyul kuni ikkita intervyu-maqola olib kelgan. Qabul komissiyasi vakillari maqolalarni qabul qilib, bu suhbat uchun yetarli ekanini bildirgan. 19-iyul kuni Regina Usmonovadan og‘zaki imtihon olgan fakultet xodimi suhbat yaxshi o‘tganini, biroq maqolalari soni atigi ikkita bo‘lgani uchun uning bahosini pasaytirishi mumkinligini unga aytgan. Xodimning so‘zlariga ko‘ra, yaxshi baho uchun maqolalar soni kamida to‘rtta bo‘lishi lozim edi. Oqibatda Regina Usmonova og‘zaki imtihon uchun qo‘lga kiritish mumkin bo‘lgan 21 balldan atigi 4 ball olgan.
Qayd etish joiz, Xalqaro jurnalistika fakultetining saytida 15-iyun sanasi bilan berilgan axborotda abituriyentlar, hujjatlari bilan bir qatorda, OAVda e’lon qilingan materiallarini ham qabul komissiyasiga topshirishi talab etilishi, “bu ijodiy ishlar natijalari abituriyentlarning o‘tish ballariga qo‘shib hisoblanishi” bildirilgan. Biroq bu talab qaysi hujjat, qaysi nizomga asoslangani ko‘rsatilmagan.
Imtihon davomidagi qoidabuzarliklar
Regina Usmonovaning O‘zbekiston Prezidenti virtual qabulxonasiga yo‘llangan arizasida qayd etilishicha, uning hujjatlari qabul qilib olingan vaqtda ijodiy imtihonlar 16, 17 va 18-iyul kunlari soat 8:00 da boshlanishi, imtihonoldi konsultatsiyalari esa 6 va 13-iyul kunlari — ya’ni, abituriyentlardan hujjatlar qabuli davom etayotgan vaqtda bo‘lishi ma’lum qilingan (bu esa qoidalarga ziddir).Abituriyent 3-iyul kuni maqolalarini topshirish uchun qabulga kelganida, unga konsultatsiyalar bo‘lmasligi aytilgan. “Shu vaqtda, tasodifan, stolda ijodiy imtihonlarning yangi jadvalini ko‘rib qoldim. Unda birinchi imtihon 18-iyulga, qolgani esa 19-iyulga belgilangani ko‘rsatilgan edi”, — deydi Regina Usmonova.
17-iyul kuni kech soat 22:16 da uning telefoniga noma’lum raqamdan birinchi ijodiy imtihon 18-iyul kuni soat 8:00 da bo‘lishi haqida SMS xabar kelgan. “Agar men 3-iyul kuni tasodifan yangi jadvalni ko‘rib qolmaganimda, yarim tunda noma’lum raqamdan kelgan SMS xabar asosida ish tutishim kerak bo‘larmidi?”, — deb savol qo‘yadi abituriyent qiz.
Regina Usmonovaning so‘zlariga ko‘ra, yozma imtihon vaqtida universitet ma’muriyati vakillaridan biri abituriyentlardan biriga penal uzatgan. Yana bir abituriyent esa imtihon qoidalariga zid ravishda tashqariga chiqib kelgan. “Bu harakatlarning bari kuzatuvchilar tomonidan e’tiborsiz qoldirildi”, — deydi abituriyent.
Apellyatsiya jarayonidagi qiyinchiliklar
Ijodiy imtihonlarning natijalari 20-iyul kuni e’lon qilingan. Regina Usmonova insho uchun 50 balldan 30 ball, og‘zaki suhbat uchun esa, yuqorida qayd etilganidek, 21 balldan 4 ball olgan. “Men shu kuniyoq menga inshoim nusxasini, imtihon bayonnomasi va xulosasi nusxalarini topshirish iltimosi bilan ikkita apellyatsiya arizasi yozdim. Bunga javoban og‘zaki imtihon bo‘yicha apellyatsiya berib bo‘lmasligini aytishdi, arizalarimni qabul qilishdan bosh tortishdi, men va onam bilan yuqori pardada gaplashib, menga ma’naviy bosim o‘tkazishga urinishdi”, — deydi Regina Usmonova.Abituriyentning so‘zlariga ko‘ra, apellyatsiyaga o‘ndan ziyod odam kelgan, jarayon 21:00 ga qadar davom etgan; Reginaning o‘zi esa tarkibida universitet rektori va prorektorlari, fakultet xodimlari bo‘lgan apellyatsiyasi komissiyasi oldiga 20:00 da kirgan. “Apellyatsiya natijalaridan qoniqqanim yo‘q, chunki komissiya mening ballarim nima uchun pasaytirilgani yuzasidan yetarlicha dalil keltira olmadi. Inshoda o‘ylab topilgan xatolarni ko‘rdim, shu sababli ham uning nusxasini menga topshirishmadi”, — deb yozadi abituriyent.
“Men bino ichida bo‘lgan vaqtim, tashqarida kutib turgan otam mendan xabar olish maqsadida bino ichiga kirmoqchi bo‘lgan. Biroq kirish joyi oldida turgan universitet xodimlari 56 yoshli otamni turtib yuborib, unga baqirgan, o‘qtalgan, ‘istagan joyingizga shikoyat qiling!’, deb gapirgan”, — deya qo‘shimcha qilgan Regina Usmonova.
Endi nima bo‘ladi?
Ta’kidlanganidek, Xalqaro jurnalistika fakulteti ijodiy imtihonlari bilan bog‘liq birinchi bahsli vaziyat haqida xabar berilganidan so‘ng na universitet, na fakultet bunga rasmiy munosabat bildirdi. Abituriyent Regina Usmonovaning Prezident Virtual qabulxonasi va Toshkent shahar prokuraturasiga bergan arizasida undan hujjatlarni qabul qilib olgan, apellyatsiyaga berish jarayonida qarshilik ko‘rsatgan, apellyatsiyasi komissiyasi tarkibida o‘zini tanishtirgan barcha shaxslarning ism-shariflari ko‘rsatilgan. Shuningdek, arizaga qator daliliy ashyolar, xususan, apellyatsiyaga ariza berish va apellyatsiya komissiyasi bilan munozara vaqtidagi jarayonlar yozilgan audiofayllar ilova qilingan.
Kim bilsin, universitet va fakultet o‘rniga aynan Virtual qabulxona va prokuratura o‘z munosabatini bildirar, chigallikni bartaraf etib, vaziyatga oydinlik kiritar. Bunisini vaqt ko‘rsatadi. Ibratli holat sifatida O‘zbekiston milliy universitetidagi ijodiy imtihonlar o‘tkazilgan auditoriyalarga kuzatuv kameralari o‘rnatilgani, abituriyentlarning ota-onalari, yaqinlari imtihon auditoriyalaridagi barcha jarayonlarni bevosita kuzatib turish imkoniga ega bo‘lganini misol qilib keltirish mumkin.
Izoh (0)