O‘zMUda Jurnalistika fakultetining ijodiy imtihonlari adolatli o‘tishi uchun kuzatuv kameralari o‘rnatildi

Mirzo Ulug‘bek nomidagi O‘zbekiston Milliy universitetida ijodiy imtihonlar o‘tkazilgan auditoriyalarga kuzatuv kameralari o‘rnatildi. Bu haqda universitet vakillari “Daryo” internet-nashriga ma’lum qildi.

Xabar berishlaricha, universitetning Jurnalistika, Ijtimoiy fanlar fakultetlarida, shuningedk, Iqtisodiyot fakultetining pensiya ishi yo‘nalishida ijodiy imtihonlar o‘tkazilgan.

Imtihonlarni oshkora va adolat mezonlari asosida tashkil etish maqsadida imtihon bo‘layotgan barcha auditoriyalarga kuzatuv kameralari o‘rnatilgan.

“Bu esa ota-onalar farzandlarini monitor orqali bemalol kuzatib turishlarini ta’minladi”, — deyiladi universitet axborotida.

Universitet vakillarining “Daryo”ga ma’lum qilishlaricha, 1-avgust kuni bo‘ladigan test sinovlari vaqtida ham barcha imtihon auditoriyalariga kuzatuv kameralari o‘rnatiladi.

Avvalroq universitetda tatbiq etilgan “aqlli texnologiyalar” vositasida boshqa abituriyentning o‘rniga hujjat topshirishga uringan “ziyoli snayperlar” fosh etilgani haqida xabarlar berilgan edi.