«Дарё» интернет-нашрида 22 июль куни Ўзбекистон давлат жаҳон тиллари университетида Халқаро журналистика факультетининг ижодий имтиҳони баҳосидан норозилик билдирган фуқарога куч ишлатилгани ҳақида хабар берилган эди. Facebook фойдаланувчиси Марҳабо Алиева университет ходими унинг «қўлларини қайириб, ҳар хил ҳақоратли сўзлар билан ҳақоратлагани»ни маълум қилган эди.
Мавзуга доир: Ўзбекистон давлат жаҳон тиллари университетида ижодий имтиҳон баҳосидан норозилик билдирган фуқарога куч ишлатишди (видео)
Мақола нечта бўлиши керак?
Абитуриент Регина Усмонова илк зиддиятли вазиятга ҳужжатларини топшириш жараёнидаёқ дуч келган. Қабул комиссиясининг факультет бўйича масъули журналистик мақолалар йўқлиги боис, Регинанинг аризаси ва ҳужжатларини қабул қила олмаслигини билдирган. Абитуриент бу ҳақда билмагани, ариза ва ҳужжатларга журналистик материаллар ҳам илова қилиниши лозимлиги ҳақида на ЎзDJТУ сайтида, на университетдаги ахборот бурчакларида ва на «Абитуриентга эслатма» китобчасида ёзилганини айтгач, масъул шахс бу университетнинг «ёзилмаган қоидаси» эканини маълум қилган.
Масъул шахснинг Регина Усмоновага тушунтиришича, мақола иккинчи ижодий имтиҳон — оғзаки суҳбат учун зарурлиги, суҳбат ўша мақола асосида олиб борилишини, қўшимчасига, мақола ижодий имтиҳонда баҳо қўйишда ҳисобга олинишини айтган. Узоқ тортишувдан сўнг, қабул комиссиясининг факультет бўйича масъули «кейинги ўн кун ичида камида битта мақола олиб келиш» шарти билан абитуриентнинг ҳужжатларини қабул қилган.
Регина Усмонова 3 июль куни иккита интервью-мақола олиб келган. Қабул комиссияси вакиллари мақолаларни қабул қилиб, бу суҳбат учун етарли эканини билдирган. 19 июль куни Регина Усмоновадан оғзаки имтиҳон олган факультет ходими суҳбат яхши ўтганини, бироқ мақолалари сони атиги иккита бўлгани учун унинг баҳосини пасайтириши мумкинлигини унга айтган. Ходимнинг сўзларига кўра, яхши баҳо учун мақолалар сони камида тўртта бўлиши лозим эди. Оқибатда Регина Усмонова оғзаки имтиҳон учун қўлга киритиш мумкин бўлган 21 баллдан атиги 4 балл олган.
Қайд этиш жоиз, Халқаро журналистика факультетининг сайтида 15 июнь санаси билан берилган ахборотда абитуриентлар, ҳужжатлари билан бир қаторда, ОАВда эълон қилинган материалларини ҳам қабул комиссиясига топшириши талаб этилиши, «бу ижодий ишлар натижалари абитуриентларнинг ўтиш балларига қўшиб ҳисобланиши» билдирилган. Бироқ бу талаб қайси ҳужжат, қайси низомга асослангани кўрсатилмаган.
Имтиҳон давомидаги қоидабузарликлар
Регина Усмонованинг Ўзбекистон Президенти виртуал қабулхонасига йўлланган аризасида қайд этилишича, унинг ҳужжатлари қабул қилиб олинган вақтда ижодий имтиҳонлар 16, 17 ва 18 июль кунлари соат 8:00 да бошланиши, имтиҳонолди консултациялари эса 6 ва 13 июль кунлари — яъни, абитуриентлардан ҳужжатлар қабули давом этаётган вақтда бўлиши маълум қилинган (бу эса қоидаларга зиддир).Абитуриент 3 июль куни мақолаларини топшириш учун қабулга келганида, унга консултациялар бўлмаслиги айтилган. «Шу вақтда, тасодифан, столда ижодий имтиҳонларнинг янги жадвалини кўриб қолдим. Унда биринчи имтиҳон 18 июлга, қолгани эса 19 июлга белгилангани кўрсатилган эди», — дейди Регина Усмонова.
17 июль куни кеч соат 22:16 да унинг телефонига номаълум рақамдан биринчи ижодий имтиҳон 18 июль куни соат 8:00 да бўлиши ҳақида SMS хабар келган. «Агар мен 3 июль куни тасодифан янги жадвални кўриб қолмаганимда, ярим тунда номаълум рақамдан келган SMS хабар асосида иш тутишим керак бўлармиди?», — деб савол қўяди абитуриент қиз.
Регина Усмонованинг сўзларига кўра, ёзма имтиҳон вақтида университет маъмурияти вакилларидан бири абитуриентлардан бирига пенал узатган. Яна бир абитуриент эса имтиҳон қоидаларига зид равишда ташқарига чиқиб келган. «Бу ҳаракатларнинг бари кузатувчилар томонидан эътиборсиз қолдирилди», — дейди абитуриент.
Апелляция жараёнидаги қийинчиликлар
Ижодий имтиҳонларнинг натижалари 20 июль куни эълон қилинган. Регина Усмонова иншо учун 50 баллдан 30 балл, оғзаки суҳбат учун эса, юқорида қайд этилганидек, 21 баллдан 4 балл олган. «Мен шу куниёқ менга иншоим нусхасини, имтиҳон баённомаси ва хулосаси нусхаларини топшириш илтимоси билан иккита апелляция аризаси ёздим. Бунга жавобан оғзаки имтиҳон бўйича апелляция бериб бўлмаслигини айтишди, аризаларимни қабул қилишдан бош тортишди, мен ва онам билан юқори пардада гаплашиб, менга маънавий босим ўтказишга уринишди», — дейди Регина Усмонова.Абитуриентнинг сўзларига кўра, апелляцияга ўндан зиёд одам келган, жараён 21:00 га қадар давом этган; Регинанинг ўзи эса таркибида университет ректори ва проректорлари, факультет ходимлари бўлган апелляцияси комиссияси олдига 20:00 да кирган. «Апелляция натижаларидан қониққаним йўқ, чунки комиссия менинг балларим нима учун пасайтирилгани юзасидан етарлича далил келтира олмади. Иншода ўйлаб топилган хатоларни кўрдим, шу сабабли ҳам унинг нусхасини менга топширишмади», — деб ёзади абитуриент.
«Мен бино ичида бўлган вақтим, ташқарида кутиб турган отам мендан хабар олиш мақсадида бино ичига кирмоқчи бўлган. Бироқ кириш жойи олдида турган университет ходимлари 56 ёшли отамни туртиб юбориб, унга бақирган, ўқталган, ‘истаган жойингизга шикоят қилинг!’, деб гапирган», — дея қўшимча қилган Регина Усмонова.
Энди нима бўлади?
Таъкидланганидек, Халқаро журналистика факультети ижодий имтиҳонлари билан боғлиқ биринчи баҳсли вазият ҳақида хабар берилганидан сўнг на университет, на факультет бунга расмий муносабат билдирди. Абитуриент Регина Усмонованинг Президент Виртуал қабулхонаси ва Тошкент шаҳар прокуратурасига берган аризасида ундан ҳужжатларни қабул қилиб олган, апелляцияга бериш жараёнида қаршилик кўрсатган, апелляцияси комиссияси таркибида ўзини таништирган барча шахсларнинг исм-шарифлари кўрсатилган. Шунингдек, аризага қатор далилий ашёлар, хусусан, апелляцияга ариза бериш ва апелляция комиссияси билан мунозара вақтидаги жараёнлар ёзилган аудиофайллар илова қилинган.
Ким билсин, университет ва факультет ўрнига айнан Виртуал қабулхона ва прокуратура ўз муносабатини билдирар, чигалликни бартараф этиб, вазиятга ойдинлик киритар. Бунисини вақт кўрсатади. Ибратли ҳолат сифатида Ўзбекистон миллий университетидаги ижодий имтиҳонлар ўтказилган аудиторияларга кузатув камералари ўрнатилгани, абитуриентларнинг ота-оналари, яқинлари имтиҳон аудиторияларидаги барча жараёнларни бевосита кузатиб туриш имконига эга бўлганини мисол қилиб келтириш мумкин.
Изоҳ (0)