Superkubok oldidan repetitsiya. “Yunayted” penaltilar seriyasida “Real”ni mag‘lub etdi

Chempionlar xalqaro kubogining AQSh turnesida ishtirok etayotgan Angliyaning “Manchester Yunayted” va Ispaniyaning “Real” klublari bugun — 24-iyul tongida o‘zaro to‘qnash keldi.

Uchrashuvning 45-daqiqasida Jessi Lingard “mankunianlar”ni hisobda oldinga olib chiqishga muvaffaq bo‘ldi. 69-daqiqaga kelib esa Kasemiro David de Xea darvozasi tomon belgilangan penaltini aniq amalga oshirib, muvozanatni tikladi.

Asosiy vaqtda g‘olibni aniqlab bo‘lmagach, hakam penaltilar seriyasiga murojaat qildi. Unda Joze Mourinyo jamoasi 2:1 hisobida ustun keldi. “Yunayted” futbolchilaridan Antoni Marsyal, Skott MakTominay, Viktor Nilsson-Lindelyof kabi futbolchilar penaltini noaniq amalga oshirgan bo‘lsa, “Real” safida Mateo Kovachich, Oskar Arnais, Teo Bernar Fransua, Karlos Kasemiro kabi futbolchilar mo‘ljaldan adashdi. Nomlari keltirilgan barcha futbolchilari 7 metrlik darvozani aniq nishonga ola bilmadi.

Madridliklardan faqatgina Luismi Kesada gol ura oldi. Manchesterliklar safidan esa Genrix Mxitaryan hamda Deyli Blind muvaffaqiyat qozondi.

Chempionlar xalqaro kubogi Kaliforniya, AQSh 24-iyul, dushanba

“Manchester Yunayted” — “Real Madrid” 1:1 (pen — 2:1)

“Manchester Yunayted”: Romero (De Xea, 46) — Jons (Smolling, 46), Bayi (Lindelyof, 46), Darmian (Valensiya, 77), Lingard (Pogba, 46), Fosu-Mensa (Blind, 46), Fellaini, Kerrik (Mxitaryan, 46), Pereyra (Errera, 46; Maktomini, 52), Marsyal, Reshford (Lukaku, 46).

Real Madrid: Navas (Kasilya, 46) — Varan (Kesada, 46), Marselo (Texero, 46), Karvaxal (Hakimi, 46), Nacho (Manu, 46), Isko (Oskar Rodriges, 46), Kroos (Kasemiro, 46), Vaskes (Teo, 46), Modrich (Kovachich, 46), Beyl (Foylasye, 46), Benzema (Dani Gomes, 46).