O‘zbekiston Prezidenti Shavkat Mirziyoyev o‘z farmoni bilan 4-iyul kuni 70 yoshga to‘lgan Mirabror Usmonovni “Do‘stlik” ordeni bilan taqdirladi. Bu haqda “Gazeta.uz” xabar bermoqda.
Mirabror Usmonov — taniqli davlat va sport arbobi. 1990—1992-yillarda O‘zbekiston savdo vaziri, 1992—1994-yillarda “O‘zbeksavdo” kompaniyasi raisi, 1994—2005-yillarda bosh vazir o‘rinbosari lavozimlarida mehnat qilgan.
2006-yildan O‘zbekiston futbol federatsiyasi prezidenti. 2013—2016-yillarda, bir vaqtning o‘zida, O‘zbekiston Milliy olimpiya qo‘mitasi (MOQ)ga ham rahbarlik qilgan.
2005-yildan senator, hozirda Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisining o‘rinbosari.
Prezident farmonida ta’kidlanishicha, Mirabror Usmonov davlat boshqaruvi organlari va jamoat tashkilotlaridagi ko‘p yillik samarali va fidokorona mehnati, O‘zbekistonning xalqaro maydondagi obro‘-e’tiborini yuksaltirish, yosh avlodni jismoniy va ma’naviy yetuk insonlar etib tarbiyalash ishiga qo‘shgan katta hissasi uchun yuksak unvon bilan taqdirlandi.
MOQ saytida e’lon qilingan tabriknomada O‘zbekiston olimpiya delegatsiyasi Mirabror Usmonov rahbarligida eng yaxshi natijaga erishgani alohida qayd etilgan. 2016 yili Braziliyada bo‘lib o‘tgan yozgi Olimpiya o‘yinlarida O‘zbekiston termasi 13 medalni qo‘lga kiritib, umumjamoa hisobida 21-o‘rinni egalladi.
Mirabror Usmonov bungacha “Mehnat shuhrati” (1995-yil), “Fidokorona xizmatlari uchun” (2007) va “El-yurt xizmati” (2011) ordenlari bilan taqdirlangan. Bundan tashqari, u Osiyo Olimpiya kengashining “Oltin ordeni” va FIFAning “Xizmatlari uchun” ordeni bilan mukofotlangan.
Izoh (0)